सत्तारुढ दल नेकपा (एमाले)का अध्यक्ष केपी शर्मा ओलीले राजसंस्थाको मुद्दा बोकिरहेको दल राष्ट्रिय प्रजातन्त्र पार्टी (राप्रपा) र पूर्वराजा ज्ञानेन्द्र शाहलाई घुमाउरो पारामा कटाक्ष गरेका छन् ।

शनिवार बूढानीलकण्ठ नगरपालिकामा आयोजित नगर अस्पतालको उद्घाटन समारोहमा कटाक्ष गर्दै उनले संविधानको दायरामा आएर राजनीति गर्न सुझाव दिए ।

पूर्वप्रधानमन्त्री ओलीले राप्रपाले उठाएको मुद्दा र ज्ञानेन्द्रले फेरि राजा हुने देखेको सपना पूरा नहुने संकेतसमेत गरे । 

‘संविधान, परिवर्तन र जनताको सर्वोच्चता नै नमान्ने र मलाई एउटा माली चाहियो भनेर कुद्ने, त्यो माली थपना घरमा गर्दै गर, देशले माली व्यक्तिलाई थपना गरिँदैन, एउटा परिवारलाई थपना हुँदैन’, उनले भने ।

ओलीले अहिले केही मानिसले उत्ताउलो भएर आन्दाेलन गरिरहेको टिप्पणी पनि गरे । अहिले संवैधानिक बाटो र लोकतान्त्रिक विधिबाट कुनै पनि माग पूरा गर्न कतै प्रतिबन्धित नभएकाले त्यसभित्र रहेर आफ्ना माग पूरा गर्न पनि उनले आग्रह गरे ।   

‘अहिले पनि केही मान्छेहरू उत्ताउला देखिँदैछन् । त्यस्ता राजनीतिक व्यक्ति र समूहलाई आग्रह गर्छु- संविधानको दायराभित्र आउनुस्, संवैधानिक र शान्तिपूर्ण दायराभित्र आउनुस् र त्यसभित्र रहेर आफ्नो माग गर्नुस्,’ उनले आग्रह थियो । 

ओलीले राजतन्त्रकाल र पञ्चायतकालमा भएका ज्यादतीको स्मरण गर्दै अहिलेको व्यवस्था नै सबैभन्दा उत्तम रहेको दाबी गरे ।

पछिल्लो समय राप्रपा राजसंस्था र हिन्दूराष्ट्र फर्काउन तथा संघीयता खारेज गर्न भन्दै आन्दोलनरत छ ।

अर्कोतिर पूर्वराजा ज्ञानेन्द्रले पनि राजसंस्था फर्काउनु पर्ने अभिव्यक्ति दिइरहेका छन् । नयाँ वर्षको उपलक्ष्यमा शनिवार शुभकामना दिँदै उनले आफ्नो प्रकृति, परिवेश, मान्यता र स्थायी स्थिर संस्था प्रति ध्यान केन्द्रित हुनु पर्छ भन्ने धारणा नेपाली जनमतमा बढ्दै गएको बताएका छन् ।

त्यसका लागि देशको माया गर्ने र देशवासीको भलो चाहने सबै मिलेर समझदारी बनाउनुपर्ने उनको धारणा छ । यसप्रति ओलीले कटाक्ष गरेका हुन् । 

यद्यपि, उनले कटाक्ष गर्ने क्रममा राप्रपा र पूर्वराजा ज्ञानेन्द्रकाे नाम भने सिधै लिएनन् ।  

राजसंस्थामा समझदारी बनाउनका निम्ति नयाँ वर्षले प्रेरणा देओस्: पूर्वराजा