‘केटी भगाएको’ निहुँमा धनुषाको औरही गाउँपालिका–१ पौडेसरमा बिहीबार तनावको स्थिति उत्पन्न भएको छ ।

भागेका केटा र केटीका परिवारबीच विवाद उत्पन्न भएर केटी पक्ष प्रदर्शनमा उत्रिएपछि प्रहरीले स्थिति नियन्त्रणमा लिन खोज्दा झडप भएको हो ।

दुई जोडी युवायुवतीले भागेर विवाह गरेको विषयलाई लिएर झडपको स्थिति आएको प्रहरीको भनाइ छ ।

यसअघि केटी पक्षले केटा पक्षकालाई मुद्दा हालेको थियो । त्यसपछि केटा पक्षका पाँच व्यक्तिलाई प्रहरीले नियन्त्रणमा लिइसकेको थियो । प्रहरीले उनीहरूलाई अपहरण तथा शरीर बन्धक मुद्दा पनि चलाइसकेको पनि छ ।

यस्तोमा पनि केटा पक्षकालाई थप कारबाहीको माग गर्दै केटी पक्षले बिहीवार सडक अवरुद्धसहित प्रदर्शन गरेको हो । प्रहरीले खुलाउने प्रयास गर्दा प्रदर्शनकारीले प्रहरीको गाडीमा आक्रमण गरेको र यस क्रममा नेपाल प्रहरीका दुई र सशस्त्र प्रहरी बलका एकजना घाइते भएको धनुषाका डीएसपी रञ्जन अवाले लोकान्तरलाई जानकारी दिए । 

प्रदर्शनले उग्ररुप लिएपछि स्थिति नियन्त्रणमा लिन प्रहरीले दर्जन सेल अश्रुग्यास प्रहार गरेको थियो ।