संखुवासभाको चैनपुर र मकालु गाउँपालिका, नुवाकोटको सूर्यगढी र इलामको निन्दाखुमा भएको आगलागी प्रहरीले नियन्त्रणमा लिएको छ ।​​​

चैनपुर नगरपालिका २ तिखिढुङ्गा बस्ने झलकबहादुर अधिकारीको घरमा गएराति आगलागी हुँदा अन्नपात, भाँडावर्तन, लत्ताकपडा लगायत विभिन्न सामान र चौपाया जलेर करिब ८ लाख रुपैयाँ बराबरको धनमाल नष्ट भएको प्रहरीले जनाएको छ ।

​यसैगरी संखुवासभाको मकालु गाउँपालिका ५ खोप्ताक पाठागाउँ बस्‍ने ४४ वर्षीय भीमलाल तामाङको घरमा विद्युत सर्ट भई शुक्रवार बिहान आगलागी भएको थियो ।

आगलागीबाट ८० हजार रुपैयाँ नगद, सुनचाँदी, अन्नपात, लत्ताकपडालगायतका विभिन्न सामानहरू जलेर करिब ११ लाख ३९ हजार ५ सय रुपैयाँ बराबरको क्षति भएको प्रहरीले जनाएको छ ।

यस्तै, आगो निभाउने क्रममा घाइते भएकी भीमलालकी श्रीमतीको प्राथमिक स्वास्थ्य केन्द्र नुममा उपचार भइरहेको छ ।

यता नुवाकोटको सूर्यगढी गाउँपालिका ३ भुन्टेस्थित चतुरमाला सामुदायिक वनबाट फैलिएको आगो तेजबहादुर तामाङको घरमा सल्किँदा अन्नपात, लत्ताकपडा तथा आँगनमा रहेको बा ५७ प ५३९६ नम्बरको मोटरसाइकल जलेर करिब ८ लाख रुपैयाँ बराबरको क्षति भएको छ ।

यस्तै, इलामको इलाम नगरपालिका ११ निन्दाखु टोल बस्ने उमराम खनालको घरमा शुक्रवार बिहान आगलागी हुँदा २ तोला सुन, ४ तोला चाँदी, अन्नपात, भाँडावर्तन, लत्ताकपडा लगायतका विभिन्न सामानहरू जलेर करिब ८ लाख रुपैयाँ बराबरको धनमाल नष्ट भएको प्रहरीले जनाएको छ ।

स्थानीय बासिन्दा र दमकलको सहयोगमा प्रहरीले आगलागी नियन्त्रणमा लिएको थियो ।