०५ साउन २०८३, मंगलबार
कोशी अस्पतालको स्वामित्वमा रहेको जग्गामा निर्माण भएको सटरको भाडा दाबी गर्दै नेपाल क्षयरोग निवारण संस्थाले एक फार्मेसीमा ताला लगाइदिएको छ ।
उच्च अदालतको फैसलालाई समेत चुनौती दिँदै संस्थाले ‘मोनिका फार्मेसी’ रहेको सटरमा ताला लगाएको हो ।
संस्थाले प्रयोग गर्दै आएको ६ कठ्ठा ८ धुर जग्गा कोशी अस्पतालमातहत रहने फैसला उच्च अदालत विराटनगरले २०७७ माघ २६ गते गरेको थियो । अदालतको फैसला कार्यान्वयनका क्रममा अस्पतालले उक्त जग्गामा रहेका भौतिक संरचनाको भाडा उठाउन थालेपछि क्षयरोग निवारण संस्थाले सटरमा ताला लगाएको हो ।
अदालतको फैसलापछि कोशी अस्पतालका मेसु डा. रविराज सिंहले मोनिका फार्मेसीसहित ८ वटा सटरको भाडा बुझाउन भदौ २ गते पत्राचार गरेका थिए ।
प्रितम मुखियाले सञ्चालन गरेको मोनिका फार्मेसीले भदौ ९ गते कोशी अस्पताललाई साउन महिनाको भाडा १२ हजार रुपैयाँ बुझाएको छ ।
कोशी अस्पताललाई भाडा बुझाएको १० दिनपछि भदौ १९ गते नेपाल क्षयरोग निवारण संस्था मोरङका कर्मचारी आएर फार्मेसीमा ताल्चा लगाइदिएको सञ्चालक मुखियाले लोकान्तरसँग बताए । अहिलेसम्म त्यो ताला खुल्न सकेको छैन ।
नेपाल औषधि व्यवसायी संघ मोरङका अध्यक्ष देशबन्धु ढकालले दुई संस्थाबीचको विवादलाई लिएर फार्मेसीमा तालाबन्दी गर्नु उचित नभएको बताए ।
‘छलफलको माध्यमबाट निकास निकाल्नुपर्ने थियो । बिरामीलाई अत्यावश्यक औषधि बिक्री/वितरण हुने फार्मेसीमा ताला लगाउनु गलत हो,’ उनले भने, ‘लगाएको ताला तत्काल खुल्नुपर्छ । नभए व्यवसायीहरू आन्दोलनमा उत्रिन बाध्य हुन्छन् ।’
अस्पतालका मेसु डा. रविराज सिंहले अदालतले फैसला गरिसकेको अवस्थामा आफ्नो स्वामित्वमा रहेको जग्गाभित्रको सटर भाडा उठाउनु अस्पताल प्रशासनको दायित्व भएको बताए ।
यता नेपाल क्षयरोग निवारण संस्थाले भने पटक–पटक ताकेता गर्दा पनि औषधि पसलले भाडा नतिरेपछि ताला लगाइएको दाबी गरेको छ ।
आफूहरूले बनाएको भवनको भाडा पाउनुपर्ने संस्थाका मोरङ उपाध्यक्ष घनश्याम राठीले बताए । संस्थाले प्रतिसटर १२ देखि २० हजारसम्मका दरले मासिक १ लाख ७५ हजार रुपैयाँभन्दा बढी उठाइरहेको छ ।
‘अहिले हामीले उपभोग गरेको जग्गा पहिले कोशीको अस्पतालको थिएन,’ उनले भने, ‘पछि अस्पतालले सबै एकलौटी बनाएको रहेछ । हामीले बनाएको भवनको भाडा मागेका हौं ।’
जिल्ला प्रशासन कार्यालय मोरङले कोशी अस्पताल र क्षयरोग निवारण संस्थालाई छलफलका लागि बोलाएको छ ।
आइतबार बिहान औषधि व्यवसायीको टोलीले पसल खुलाउन पहल गरिदन आग्रह गरेपछि प्रमुख जिल्ला अधिकारी प्रेमप्रसाद भट्टराईले दुवै पक्षलाई छलफलमा बोलाएका हुन् ।
कोशी अस्पतालको जग्गा कब्जा गरेर व्यापार/व्यवसाय गरिरहेकालाई हट्न भनेर पटक–पटक पत्राचार गर्दा समेत जग्गा खाली भएको छैन ।
अस्पताल विकास समितिले पटक–पटक लिखित पत्र पठाउँदा पनि कुनै वास्ता नगरेको विकास समितिका तत्कालीन सदस्य मुकेश बुढाथोकीले बताए ।
राजनीतिक पहुँचको आडमा जग्गा कब्जा गरिराखेको बुढाथोकीको आरोप छ ।
राजनीतिक आडभरोसामा विभिन्न संघ–संस्थाले सरकारी अस्पतालको जग्गामा भवन र संरचना बनाएर व्यापार गर्दै आएका छन् । संघ–संस्थाले भाडामा लगाएका भवनको रकम व्यक्तिगतरूपमा समेत उपयोग गरिरहेको अस्पताल प्रशासनले जनाएको छ ।
अस्पतालको नाममा विराटनगरको मुख्य बजारमा ५ बिघा ८ कट्ठा जग्गा छ । उक्त जग्गामध्ये १५ कट्ठाभन्दा बढी जग्गा विभिन्न संघ–संस्थाले कब्जा गरेका छन् ।
अस्पतालको जग्गा क्षयरोग निवारण संस्था, गणेश मन्दिर, नेपाल रेडक्रस सोसाइटी, देवकोटा पुस्तकालय लगायतले कब्जा गरेका छन् ।
जग्गामा बनाएको संरचनाबाट उठ्ने भाडासमेत ती संस्थाहरूले नै प्रयोग गर्दै आएको अस्पताल विकास समितिले जनाएको छ । अस्पतालको जग्गा ओगटेर बनाइएका तीनवटा भवन भने यसअघि नै भत्काइएको थियो ।
अस्पताल प्रशासनका अनुसार गणेश मन्दिरले दुई कट्ठा, देवकोटा पुस्तकालयले अढाई कट्ठा, नेपाल रेडक्रस सोसाइटीले दुई कट्ठाभन्दा बढी जग्गा ओगटेका छन् ।
जग्गामा संरचना बनाएर ३० जनालाई भाडामा लगाइएको छ ।
