०५ साउन २०८३, मंगलबार
पूर्व–पश्चिम राजमार्गअन्तर्गत पश्चिम नवलपरासीको दाउन्ने खण्डमा पटक–पटक सडक भासिँदा दशैँ मनाउन घर फर्किरहेका यात्रुले सास्तीमाथि सास्ती खेप्नु परिरहेको छ । शुक्रवार साँझ बर्दघाट नगरपालिका वडा नम्बर–४ मा पर्ने सडक भासिएर ६ घण्टा रोकिएको थियो । मध्यराति १२ बजे एकतर्फी खुलेको सडक शनिवार साँझसम्म पनि यसरी नै सञ्चालित छ ।
ठूला मालबाहक सवारीसाधनका कारण सडक दबिएपछि पटक–पटक मर्मत गर्नुपरेको छ । पश्चिमबाट पूर्व जाने गाडीको लाइन सुनवलदेखि बर्दघाटसम्म छ ।
त्यस्तै पूर्वबाट पश्चिम आउने गाडीको लाइन अरुणखोलादेखि दुम्कीबाससम्म १० किलोमिटरसम्मको छ । एकसातादेखि सडकमा राम्रोसँग गाडी पास भइरहेका छैनन् ।
इलाका प्रहरी कार्यालय, बर्दघाटका प्रहरी निरीक्षक दीपेन्द्र बानियाँले सडक पटक–पटक दबिरहँदा गाडी दोहोरो सञ्चालनमा कठिन भइरहेको बताए । ‘मर्मतसँगै शुक्रवारदेखि नै हामीले दुवै तर्फबाट ५०–५० वटा गाडी क्रस गराउँदै आइरहेका छौं,’ उनले भने, ‘पश्चिमबाट पूर्व जाने गाडी बर्दघाटमा रोकेका छौं र पूर्वबाट पश्चिम आउने गाडी दुम्कीबासमा रोकिराखेका छौं ।’ सडक दुईतर्फ सञ्चालन गर्न भने अझै समय लाग्ने बानियाँको भनाइ छ ।
दाउन्ने खण्डमा सडक भासिएपछि सोमवार साँझदेखि बन्द भएको सवारी आवागमन मंगलवार बिहान पौने ९ मा एकतर्फी सञ्चालनमा आएको थियो । अविरल वर्षाका कारण सडकको रिर्टेनिङ वाल भत्काउनका साथै ४०० मिटर जति सडक पनि भासिएको थियो । यसको मर्मतका लागि मंगलवार राति सडक पूर्णरुपमा रोकेर काम गरिएको थियो । तर शनिवार फेरि सडक भासिएको छ ।
सडक भासिँदा विद्युतको हाइटेन्सन टावरसमेत ढलेको छ । मर्मत भएर शनिवार साँझ सञ्चालनमा आए पनि ठूलो पानी परेको अवस्थामा सडक भत्किने अवस्था छ । नारायणगढबाट बुटवल आउँदै गरेका यात्रु दीपेन्द्र सिजापतिले लामो समय गाडी जाममा फस्दा ठूलो समस्या भएको बताए ।
