सहकारीको बचत रकम अपचलनको आरोपमा पक्राउ गरी रुपन्देही ल्याइएका गोर्खा मिडिया नेटवर्कका तत्कालीन प्रबन्धक तथा राष्ट्रिय स्वतन्त्र पार्टी (रास्वपा)का सभापति रवि लामिछानेसँग बुधबार पनि सरकारी वकिल कार्यालयमा बयान लिइएको छ । 

बुटवलस्थित सुप्रिम बचत तथा ऋण सहकारी संस्थाको बचत रकम दुरूपयोग गरेको आरोपमा बयानका लागि मंगलबार पोखराबाट जहाजमार्फत रूपन्देही ल्याइएका लामिछानेलाई बुधबार ९ घण्टा लगाएर विभिन्न ५० भन्दा बढी प्रश्नमा सवाल-जवाफ गरिएको छ । 

भैरहवास्थित जिल्ला सरकारी वकिल कार्यालयका प्रमुख प्रेमराज पौडेल, इलाका प्रहरी कार्यालय, बुटवलका डीएसपी विजयराज पण्डित लगायत ६ जना प्रहरी अनुसन्धान अधिकारीहरूले रविको बयान लिएका थिए । बिहान १० बजेदेखि शुरू भएको बयान साँझ ७ बजेसम्म चलेको थियो । 

रुपन्देही प्रहरी प्रवक्ता, डीएसपी लक्ष्मी खनालले रविमाथि भोलि पनि बयान जारी रहने बताइन् । उनका अनुसार बिहान कार्यालय खुल्नेबित्तिकै बयान शुरू हुनेछ । ‘अहिलेसम्मको बयानबाट मोटामोटी खाका तयार भइसकेको छ । सम्भवतः भोलि बिहीबार बयान सकेर पोखरा पठाउँछौँ होला’, डीएसपी खनालले लोकान्तरसँग भनिन्। 

दुवै दिन रविले इन्कारी बयान दिएका छन् । मंगलबार बयान दिएर बाहिरिने क्रममा सञ्चारकर्मी र समर्थकहरू देखेपछि रविले हात हल्लाउँदै भनेका थिए, ‘खोरमा थुनिने बित्तिकै बाघ स्याल हुँदैन ।’ त्यसलगत्तै प्रहरीले हस्तक्षेप गरेर उनलाई अगाडि बढाएको थियो । 

गोर्खा मिडिया नेटवर्कमा रविको १५ प्रतिशत सेयर रहेको अनुसन्धानबाट खुलेको छ । रवि राजनीतिमा आउनुअघि गोर्खा मिडिया नेटवर्कले सञ्चालन गरेको ग्यालेक्सी टेलिभिजनका प्रबन्ध निर्देशक एवं सञ्चालक थिए । सोही बेला देशका विभिन्न सहकारीबाट गोर्खा मिडिया नेटवर्कमा गैरकानूनी रूपमा रकम गएको संसदीय छानबिन समितिले निष्कर्ष निकालेको थियो । सोही आधारमा रवि लगायत यसमा संलग्न विभिन्न व्यक्तिमाथि अनुसन्धान जारी छ । तर, रविले टेलिभिजन छोडेका बेला नै आफूले सेयर बिक्री गरिसकेको र आफ्नो कुनै दायित्व नहुने बयान दिइरहेका छन् ।

बुटवलको सुप्रिम सहकारी र पोखराको सूर्यदर्शन सहकारीको बचत अपचलन गरेको आरोपमा लामिछानेसँगै गोर्खा मिडिया नेटर्वकका तत्कालीन सञ्चालक तथा पूर्व डीआईजी छविलाल जोशीलाई पनि यसअघि पोखराबाट रूपन्देही झिकाएर सरकारी वकिलको कार्यालयमा बयान लिइएको थियो । अहिले कास्की प्रहरी हिरासतमै रहेका जोशीलाई कात्तिक ६ गते सात घण्टामा ५७ वटा प्रश्न सोधिएको थियो । 

रविलाई बयानका लागि रुपन्देही ल्याइरहेका बेला गौतमबुद्ध अन्तर्राष्ट्रिय विमानस्थल बाहिर रास्वपाका कार्यकर्ताले उनको पक्षमा नाराबाजी गरेका थिए । बुधबार पनि उनीहरूले भैरहवामा प्रदर्शन र नाराबाजी गरे । बुद्धचोकमा जम्मा उनीहरूले भैरहवाको सिद्धार्थनगर नगरपालिका परिक्रमा गर्दै विरोध जनाएका थिए ।​

पोखराको सूर्यदर्शन सहकारी, बुटवलको सुप्रिमसहित अन्य सहकारीको रकम अपचलनमा समेत लामिछाने मुछिएका छन् । सांसद सूर्य थापा नेतृत्वको संसदीय छानबिन समितिले रविसहितका व्यक्तिलाई सहकारी ठगी प्रकरणमा कारबाही गर्न सिफारिस गरेको थियो । उनीहरूमाथि सहकारीको रकम गोर्खा मिडिया नेटवर्कमा ल्याएर हिनामिना गरेको आरोप छ ।  

सुप्रिमबाट २०७७ चैत १८ मा रविका नाममा मात्रै दुई करोड रूपैयाँ गएको देखिन्छ । तर,रविले आफ्नो नाममा त्यसरी रकम आएको कुरालाई इन्कार गर्दै आएका छन् । रवि सहकारी ठगीसँगै संगठित अपराध र सम्पत्ति शुद्धीकरण मुद्दामा कात्तिक २ गते साँझ काठमाडौंस्थित रास्वपाकै कार्यालयबाट पक्राउ परेका थिए । सोही राति पोखरा लगिएका उनी प्रहरी हिरासतमै रहेका बेला बयानका लागि भैरहवा ल्याइएको हो ।

कास्की जिल्ला अदालतले आइतबार रविलाई थप १३ दिन हिरासतमा राखेर अनुसन्धान गर्न अनुमति दिइसकेको छ ।
त्यसअघि प्रहरीले सुप्रिम सहकारीको १४ करोड २९ लाख रूपैयाँ गोर्खा मिडिया नेटवर्क प्रालिमा लगेर अपचलन गरेको आरोपमा रवि, छवि र जीबी राईसहित १२ जनाविरुद्ध पक्राउ गरी अनुसन्धान गर्न जिल्ला अदालतबाट अनुमति लिएको थियो । 

सुप्रिमबाट छविको नाममा पनि दुई करोड ५० लाख रूपैयाँ गएको देखिएको छ । उनले २०७७ माघ २९ गते २ करोड ५० लाखमध्ये ५ लाख सेवा शुल्क कटाएर २ करोड ४५ लाख रूपैयाँ ऋण लिएको देखिएको छ । 

रवि र छवि दुवैको नाममा गोर्खा मिडिया नेटवर्कको ग्लोबल आईएमई बैंकको खातामा रकम जम्मा भएको प्रहरी अनुसन्धानले देखाएको छ । यस प्रकरणमा प्रहरीले शुरूमै २८ जनालाई प्रतिवादी बनाए पनि गृहमन्त्री भएका बेला रविले प्रहरीलाई दबाब दिएर आफ्नो नाम हटाएका थिए । अदालतमा मुद्दा दर्ता गर्दा रवि गृहमन्त्री नै थिए । 

गुल्मीको मालिका गाउँपालिका–८ घर भएका ३० वर्षीय सागर केसीले भौचर सदर गरेर रोशनी गुरुङले गोर्खा मिडिया नेटवर्कको नाममा रहेको बैंक खातामा रकम जम्मा गरेकी थिइन् । रोशनी यसअघि नै अदालतबाट धरौटीमा रिहा भइसकेकी छन्  भने केसी अझै फरार छन् । 

रुपन्देहीका प्रहरी प्रमुख, एसपी रञ्जितसिंह राठौरका अनुसार सहकारीका १ हजार ८३१ जनाले आफूहरूको ८६ करोड बढी बचत अपचलन गरेको भन्दै प्रहरीमा उजुरी दिएका थिए । सहकारीका १० हजार ३९१ बचतकर्ताले जम्मा गरेको १ अर्ब ७ करोड रकममध्ये ८६ करोड १८ लाख २३ हजार अपचलन भएको देखिएपछि अनुसन्धान अघि बढाइएको हो। 

मुद्दा दायर भएका २८ जनामध्ये ८ जना पक्राउ परिसकेका छन् । गोर्खा मिडिया नेटवर्कका अध्यक्ष गीतेन्द्रबाबु राई (जीबी) सहित अन्य व्यक्तिहरू भने फरार छन् ।