०५ साउन २०८३, मंगलबार
आफ्नै घरमा काम गर्ने किशोरीलाई बलात्कार गरेको मुद्दा लागेका एमालेका एक नेताले तीन महिनादेखि अस्पताललाई नै कारागार बनाइरहेका छन् ।
किशोरीलाई बलात्कार आरोपमा पक्राउ परेका झापाको बिर्तामोड नगरपालिकाका पूर्वमेयर ध्रुवकुमार सिवाकोटीलाई अदालतले पुर्पक्षका लागि कारागार चलान गर्न आदेश गरेको थियो । तर, उनी तीन महिनाभन्दा बढी समयदेखि बीएन्डसी अस्पतालको भीआईपी कक्षमै बसेर सजाय कटाइरहेका छन् ।
गत पुस २२ गते झापा जिल्ला अदालतले उनलाई पुर्पक्षका लागि कारागार पठाउन आदेश गरेको थियो । तर, उनले एक दिन पनि कारागारमा बस्नु परेको छैन । उनी नेकपा एमालेका नेता हुन् । मंसिर २४ गते पक्राउ परेका उनी अनुसन्धानका क्रममा पनि हिरासत बस्नु परेन ।
प्रहरीले सिवाकोटीलाई अस्पतालमै निगरानी गरेर राखेको छ । उनी बिरामी भएकाले अस्पतालमै राखेर निगरानी गरिरहेको झापा प्रहरी प्रवक्ता, डीएसपी कृष्णबहादुर चन्दले बताए । अदालतले नै अस्पतालमा राखेर उपचार गर्नु भनेकाले त्यही अनुसार गरिएको उनले जनाए ।
बीएन्डसी अस्पताल विवादित मेडिकल व्यवसायी दुर्गा प्रसाईंको हो । जो तीनकुने घटनाको मुख्य आरोपीका रूपमा शुक्रबार मात्र पक्राउ परेर अदालतको अनुमतिले काठमाडौं प्रहरीको हिरासतमा छन् । एमाले नेता भने उनकै अस्पतालमा सजाय कटाइरहेका छन् ।
अदालतमा सिवाकोटीले आफू बिरामी भएको बताएपछि इजलासले उपचारको व्यवस्था गर्नु भन्ने आदेश दिएको थियो । त्यही आदेशमा टेकेर सिवाकोटीले कारागार छलिरहेको आरोप छ ।
सिवाकोटीले २३ वर्षदेखि प्रेसर र ३७ वर्षदेखि सुगरको बिरामी भएको बयान दिएका थिए । उनको निगरानीका लागि ४ जना प्रहरी परिचालन गरिएको प्रहरी स्रोतले बतायो ।
के थियो घटना ?
२०७४ सालमा बुवाआमाको मृत्यु भएपछि सहाराविहीन भएकी भारतको आसाम बस्ने बालिकालाई सिवाकोटीले बलात्कार गरेको आरोप लागेको छ । गरिबीको फाइदा उठाएर सिवाकोटीले बलात्कार गरेको आरोप छ । आफ्नै घरमा राखेर पढाउने भन्दै ती किशोरीलाई सिवाकोटीले जिम्मा लिएका थिए ।
नातिनीको लागि सहयोग माग्दै ती किशोरीकी हजुरआमा २०७४ मा नगरपालिका पुगेकी थिइन् । आफ्नो घरमा काम गर्नेको अभाव रहेको भन्दै सिवाकोटीले पढाउने वाचासहित राखेका थिए ।
ती किशोरीले सिवाकोटीलाई बुवा भनेर सम्बोधन गर्दै आएकी थिइन् । तर, बालिकालाई सिवाकोटीले पटक–पटक बलात्कार गरेको पीडितको जाहेरीमा उल्लेख छ । कक्षा ६ मा पढ्दादेखि नै सिवाकोटीले पटक–पटक बलात्कार गरेको पीडितले बयान दिएकी छन् ।
सिवाकोटीकी श्रीमती विदेश गएको बेला बलात्कार गरेको र कसैलाई सुनाएमा घरबाट निकालिदिने धम्की दिएको पीडितको भनाइ छ ।
स्कूलमा फी तिर्न र कापी किताब किन्न पैसा माग्दा पनि ‘सेक्स गर’ अनि मात्रै दिन्छु भनेपछि आफू बाध्य भएको पीडितले बताएकी छन् । सिवाकोटीले पोर्न भिडियो देखाएर आफूमाथि बलात्कार गरेको उनले बयानमा दिएकी छन् । ५ सय रूपैयाँ दिएर समेत सिवाकोटीले बलात्कार गरेको उनको बयान छ ।
पटक–पटक बलात्कारमा परेपछि पीडित बालिका गत मंसिर २४ गते बिहान कलेज जान्छु भनेर सिवाकोटीको घरबाट निस्किएर भारत हिँडेकी थिइन् । ठूलीआमा भारतको आसाममा बस्ने भएकोले उतै जाने सोच बनाएर हिँडेकी उनलाई काँकडभिट्टाबाट आफन्त नेपाल नामक संस्थाले उद्धार गरेको थियो ।
त्यसपछि सोधखोज गर्दा बलात्कारको पीडा सहन नसकेर उनी भारत जान खोजेको खुलेको थियो । पीडित किशोरी हाल जम्मा १५ वर्षकी छन् ।
