२८ असार २०८३, आइतबार
राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई गैरकानूनी रूपमा थुनामा राखिएको भन्दै दिएको बन्दी प्रत्यक्षीकरणको रिट निवेदनमा सोमबार सुनुवाइ हुँदैछ ।
सहकारी ठगी प्रकरणमा भैरहवा कारागारमा रहेका रविलाई गैरकानूनी रूपमा थुनिएको भन्दै आइतबार रविपत्नी निकिता पौडेलले सर्वोच्च अदालतमा रिट दायर गरेकी थिइन् । जसको प्रारम्भिक सुनुवाइका लागि पेसी आज सोमबारका लागि तोकिएको छ । कुन न्यायाधीशको इजलासमा पर्छ भन्ने चाहिँ पेसी बाँडफाँडका लागि गरिने गोलाप्रथाबाट थाहा हुनेछ ।
बुटवलको सुप्रिम बचत तथा ऋण सहकारी संस्था ठगी प्रकरणमा उच्च अदालत तुलसीपुरको बुटवल इजलासले लामिछानेलाई चैत २२ गते पुर्पक्षका लागि थुनामा पठाउन आदेश गरेको थियो ।
यसअघि रविले आफूलाई थुनामा पठाउने उच्च अदालतको आदेशविरुद्ध सर्वोच्च अदालतमा निवेदन दर्ता गराएका थिए । उक्त निवेदनमा सर्वोच्चले उच्च अदालत र जिल्ला अदालतबाट कैफियत प्रतिवेदन मगाउने आदेश गरेको थियो ।
