इराकको पूर्वी शहर कुटस्थित एक हाइपरमार्केटमा भएको भीषण आगलागीमा कम्तीमा ६१ जनाको मृत्यु भएको इराकको गृह मन्त्रालयले जनाएको छ । घटनामा दर्जनौं मानिस अझै हराइरहेका छन् भने ४५ जनालाई उद्धार गरिएको छ ।

गृह मन्त्रालयले बिहीबार दिएको जानकारी अनुसार वासित गभर्नरेटस्थित उक्त मलमा भीषण आगो लागेपछि १४ वटा जलेका शव फेला पारिएको छ । उद्धारकर्मीहरूले भवनभित्रबाट ४५ जनालाई सकुशल उद्धार गरेका छन् ।

यसअघि, एक शहर स्वास्थ्य अधिकारीले समाचार संस्था रोयटर्स‌सँग भनेका थिए, ‘हामीसँग पहिचान पुष्टि भएका ५९ जना मृतकको सूची तयार भइसकेको छ । तर, एउटा शव यति धेरै जलेको छ कि पहिचान गर्न निकै गाह्रो भइरहेको छ ।’

सामाजिक सञ्जालमा सार्वजनिक भएका भिडिओहरूमा पाँच तल्ले भवन रातभरि आगोले ढाकेको देखिन्छ, जहाँ अग्निनियन्त्रकहरू आगो नियन्त्रणमा लिने प्रयास गरिरहेका छन् ।

साताअघि मात्रै सञ्चालनमा आएको सो मलमा सुपरमार्केटसँगै रेस्टुराँ पनि थियो । इराकी सरकारी समाचार एजेन्सी (आईएनए) ले अझै केही मानिस हराइरहेको जानकारी दिएको छ ।

इराकका प्रधानमन्त्री मोहम्मद शिया अल-सुदानीले एक विज्ञप्तिमा गृहमन्त्रीलाई घटनास्थलमै खटिन निर्देशन दिँदै यस्ता घटना पुनः नदोहोरिउन् भनेर आवश्यक कदम चाल्न आदेश दिएका छन् ।

वासित प्रान्तका गभर्नर मोहम्मद अल-मैयाहीले आगलागी हाइपरमार्केट र रेस्टुराँ दुवै स्थानबाट शुरू भएको बताएका छन् । उनका अनुसार, त्यतिबेला परिवारहरू खाना खाइरहेका थिए र किनमेल गरिरहेका थिए । अग्निनियन्त्रकहरूले धेरै मानिसको उद्धार गरी आगो निभाएका थिए ।

घटनापछि तीन दिनको शोक घोषणा गरिएको छ र अनुसन्धान शुरू भएको छ । अनुसन्धानको निष्कर्ष ४८ घण्टाभित्र सार्वजनिक गरिने बताइएको छ ।

इराकमा भवन निर्माणका न्यून स्तरका मापदण्डहरूले यस्ता दुर्घटनालाई झनै गम्भीर बनाएको आरोप लाग्दै आएको छ । सन् २०२१ को जुलाईमा नासिरियाहस्थित एक अस्पतालमा लागेको आगलागीमा ६० जनाभन्दा धेरैको मृत्यु भएको थियो । 

त्यस दुर्घटनाको कारण अत्यधिक ज्वलनशील तर सस्तो ‘स्यान्डविच प्यानल’ प्रयोग गरिएको पाइएको थियो, जुन इराकमा गैरकानूनी मानिन्छ ।

यस्तै, सन् २०२३ मा निनेवे प्रान्तको प्रायः इसाई बसोबास भएको हमदानिया क्षेत्रमा एक विवाह समारोहका क्रममा हलको छतमा प्रयोग गरिएको पटाका मेसिनले आगो लगाउँदा १०० भन्दा धेरैको ज्यान गएको थियो ।