एयर इन्डियाले अघिल्लो महिनाको भीषण दुर्घटनापछि आफ्नो बोइङ ७८७ र बोइङ ७३७ विमानमा रहेको इन्धन नियन्त्रण स्विचको लकिङ प्रणालीको सावधानीपूर्वक निरीक्षण सम्पन्न गरेको छ । यो प्रक्रिया भारतको विमान नियामक प्राधिकरणको निर्देशन अनुसार गरिएको हो ।

‘निरीक्षणको क्रममा उक्त लकिङ प्रणालीमा कुनै समस्या फेला परेन’, एयर इन्डियाका प्रवक्ताले भनेका छन् । 

एयर इन्डियाले जुलाई १२ मै, नागरिक उड्डयन महानिर्देशनालयको औपचारिक निर्देशन आउनुअघि नै स्वैच्छिक रूपमा निरीक्षण शुरू गरेको जनाएको छ । निर्धारित समयभित्रै निरीक्षण सकेर नियामक निकायलाई जानकारी गराइएको एयर इन्डियाले जनाएको छ । 

एयर इन्डियाले यात्रु र चालक दलको सुरक्षाप्रति आफू पूर्ण प्रतिबद्ध रहेको स्पष्ट पारेको छ । ‘एयर इन्डिया यात्रु तथा चालक दलको सुरक्षामा सदैव समर्पित रहन्छ’, प्रवक्ताले थपे ।

यो कदम जुन १२ मा गुजरातको अहमदाबादबाट लन्डन ग्याटविकतर्फ उडेको बोइङ ७८७–८ विमान उडानपछिको केही समयमै भवनमा खस्दा भएको भयावह दुर्घटनापछि चालिएको हो । उक्त दुर्घटनामा २६० जनाको ज्यान गएको थियो, जसमा भुइँमा रहेका १९ जना पनि परेका थिए ।

विमान एउटा छात्रावास भवनमा खसेको थियो । २४२ यात्रु सवार विमानमा केवल एक जना मात्र बाँच्न सफल भएका थिए । दुर्घटनाको कारण अझै अनुसन्धानमै रहे पनि त्यसयता भारतलगायत अन्तर्राष्ट्रिय उड्डयन क्षेत्रमै सुरक्षा प्रोटोकलप्रति गम्भीर ध्यान दिइएको छ ।

उक्त इन्धन नियन्त्रण स्विचहरू विमानका इञ्जिनमा इन्धन प्रवाह नियन्त्रण गर्न प्रयोग गरिन्छ । पाइलटहरूले इञ्जिन शुरू गर्न, बन्द गर्न वा उडानकै क्रममा इञ्जिनमा समस्या आएमा म्यानुअली रोक्न वा फेरि शुरू गर्न यस्ता स्विच प्रयोग गर्छन् ।