०९ साउन २०८३, शनिबार
टी–२० विश्वकप एसिया तथा इस्ट एसिया प्यासिफिक छनोटअन्तर्गत सुपर सिक्सको पहिलो खेलमा नेपालले उत्कृष्ट कमब्याक गर्दै जीत हात पारेको छ ।
ओमान क्रिकेट एकेडेमीको मैदानमा आइतबार साँझ सम्पन्न खेलमा नेपालले यूएईलाई १ रनले पराजित गरेको हो ।
१४१ रनको लक्ष्य पछ्याएको यूएई जीततर्फ अघि बढ्दा नेपालले रोमाञ्चक जीत हात पारेको हो । १० ओभरमा १ विकेट गुमाएर ७५ रनको अवस्थामा रहेको यूएई अन्ततः पराजित बन्यो ।
अन्तिम ओभरमा जीतमा लागि १० रन आवश्यक हुँदा यूएईले ९ रन मात्रै जोड्न सक्यो ।
दीपेन्द्रसिंह ऐरीले ३ विकेट लिए ।
यस्तै, सोमपाल कामी, गुल्सन झा र सन्दीप लामिछानेले समान एक/एक विकेट लिए ।
यूएईको लागि अलिशान सराफुले ४० बलमा ५८ रन बनाए । दीपेन्द्रले उनलाई आउट गरेपछि नेपालले खेलमा कमब्याक गरेको थियो ।
ध्रुव परासरले १८ बलमा २८ रन बनाए । खेलमा विनिङ सट हान्ने धुनमा उनलाई पनि ऐरीले क्याचआउट गराएपछि नेपाल जीततर्फ अघि बढ्यो ।
अन्तिम बलमा तीन रन चाहिँदा यूएईले १ रनमात्रै जोड्न सक्यो । दुई रन लिने क्रममा रनआउट भएपछि अन्तिम बलमा नेपालले रोमाञ्चक जीत हासिल गरेको हो ।
यूएईमाथिको जीतसँगै नेपालले विश्वकप छनोटमा ४ अंक जोडेको छ । यस अघि समूह चरणमा जापानलाई पराजित गरेपछि नेपाल अंकसहित सुपर सिक्समा पुगेको थियो ।
यसअघि टस जितेर ब्याटिङ गरेको नेपालले २० ओभरमा ६ विकेट गुमाउँदै १४० रन बनाएको थियो ।
नेपालका लागि ओपनर आशिफ शेखले ५१ रनको अर्धशतकीय पारी खेले ।
कुशल भुर्तेलले २८, रोहित पौडेलले २०, गुल्सन झाले १४ र कुशल मल्लले १० रन बनाए ।
नेपालले चारवटा छक्का र ९ वटा चौका मात्रै प्रहार गरेको थियो ।
नेपालले भोलि कतारसँग खेल्नेछ ।
