०९ साउन २०८३, शनिबार
संयुक्त अरब इमिरेट्स (यूएई) मा जारी आईसीसी क्रिकेट विश्व कप लिग–२ अन्तर्गतको महत्त्वपूर्ण शृंखलामा आइतबार नेपालले बलियो प्रतिद्वन्द्वी अमेरिकाको सामना गर्दैछ ।
दुबई इन्टरनेशनल क्रिकेट स्टेडियममा हुने उक्त खेलमा नेपाली टोलीले पहिले फिल्डिङ गर्ने भएको छ । नेपाली टोलीले टस जिती पहिले फिल्डिङ गर्ने निर्णय लिएको हो । खेल बिहान ११:१५ बजे शुरू हुनेछ ।
नेपाल र अमेरिकाबीच हालसम्म नौवटा एकदिवसीय अन्तर्राष्ट्रिय खेल खेलिएको छ । त्यसमध्ये नेपालले चार र अमेरिकाले चार खेलमा जीत हात पारेका छन् । एक खेल भने अनिर्णित रूपमा सकिएको छ ।
घरेलु मैदानमा अमेरिकाले तीन खेल जितेको छ भने नेपालले घरेलु मैदानमा खेलिएको दुई खेलमा अमेरिकालाई हराएको छ । ‘न्यूट्रल भेन्यू’ मा नेपालले दुई र अमेरिकाले एक खेल जितेका छन् । यूएईमा भने यी दुवै टोली पहिलो पटक आपसमा भिड्न लागेका हुन् ।
शृंखलामा नेपाल र अमेरिकासँगै आयोजक यूएई पनि सहभागी छ । लिग–२ को जारी सिजनमा खेल्न लागिएको यो १५ औं शृंखला हो । नेपालले खेल्न लागेको भने यो पाँचौं शृंखला हो ।
लिग–२० शृंखलाको खेल ५० ओभरको हुन्छ । लिग–२ प्रतियोगितामा सहभागी आठवटै राष्ट्रले ३६–३६ खेल खेल्नेछन् । प्रत्येक टोलीले घरेलु मैदानमा तीन र विपक्षीको मैदानमा ६ वटा शृंखला खेल्नेछन् ।
लिग–२ प्रतियोगिताको समाप्तिपछि अंक तालिकाको माथिल्लो चार स्थानमा रहने राष्ट्र सिधै आगामी एकदिवसीय विश्वकपको छनोट चरणमा प्रवेश गर्नेछन् ।
अन्तिम चार स्थानमा रहने राष्ट्रले भने विश्वकप क्वालिफायरका लागि प्ले–अफ चरण खेल्नु पर्नेछ । जारी सिजनका लिग–२ तालिकामा नेपाली टोलीको अवस्था खासै सन्तोषजनक छैन ।
यद्यपि, नेपाल र यूएईले अन्य टोलीको तुलनामा कम खेल खेलेका छन् । अमेरिका २० खेलबाट २८ अंक बटुल्दै तालिकाको दोस्रो स्थानमा छ । अमेरिकाले १४ जित र ६ हारको नतिजा निकालेको छ ।
यसैगरी, १६ खेलबाट १२ अंक जोडेको नेपाल तालिकाको सातौं स्थानमा छ । नेपालले पाँच जित र नौ हारको नतिजा निकालेको छ । नेपालको दुई खेल अनिर्णित रूपमा सकिएको छ ।
यूएई भने १६ खेलबाट केवल ६ अंक जोड्दै तालिकाको आठौं स्थानमा छ । यूएईले हालसम्म तीन खेलमा मात्र सफलता हात पार्न सकेको छ । १३ खेलमा भने यूएई पराजित भएको छ ।
