अमेरिकाका ब्याटिङ अलराउन्डर मिलिन्द कुमारले नेपाल प्रिमियर लिग (एनपीएल) क्रिकेटको दोस्रो संस्करण काठमान्डु गोर्खाजबाट खेल्ने भएका छन् । काठमान्डु गोर्खाजले तेस्रो विदेशी खेलाडीका रूपमा ३४ वर्षीय मिलिन्दलाई अनुबन्ध गरेको हो ।

काठमाडौं स्पोर्टस डेभलपमेन्ट भेन्चर्स प्रालिको स्वामित्वमा रहेको काठमान्डु गोर्खाजले यसअघि नै इङ्ल्यान्डमा खेल्दै आएका दक्षिण अफ्रिकाका विकेटकिपर ब्याट्सम्यान रिकार्डो भास्कोनेसेलोस र नामिबियाका कप्तान जेरहार्ड इरस्मसलाई भित्र्याइसकेको छ ।

पछिल्लो समय मिलिन्द उत्कृष्ट लयमा छन् । हाल दुबईमा जारी नेपाल सम्मिलित विश्वकप लिग–२ क्रिकेटमा उनले नेपालविरुद्ध ५० बलमा ७० र यूएईविरुद्ध ८१ बलमा ७१ रन बनाएका थिए ।

‘मिलिन्दले अमेरिकी टोलीका लागि महत्त्वपूर्ण भूमिका निर्वाह गर्दै आएका छन्,’ काठमान्डु गोर्खाजका प्रशिक्षक मोन्टी देसाईंले भनेका छन्, ‘फरक परिस्थिति र दबाबमा पनि खेल्न सक्ने उनको क्षमता उत्कृष्ट छ । उनलाई काठमान्डु गोर्खाज परिवारको हिस्साको रूपमा भित्र्याउन पाउँदा हामी निकै उत्साहित छौं ।’

उनले दिल्लीबाट सन् २०११ मा रणजी ट्रफीमा ‘डेब्यू’ गरेका थिए । त्यसपछि उनले सिक्किम, त्रिपुराबाट भारतको घरेलु क्रिकेटमा खेलेका थिए । मिलिन्द दुई पटक इन्डियन प्रिमियर लिगको टोलीमा समावेश थिए ।

सन् २०१४ मा दिल्ली डेयरडेभिल्सले १० लाख र सन् २०१९ मा रोयल च्यालेन्जर्स बेङ्लोरले बेस प्राइस २० लाखमा उनलाई लिएको थियो । तर, उनले आईपीएलमा खेल्ने अवसर भने पाएका थिएनन् ।

उनले पछिल्लो तीन सिजन अमेरिकाको मेजर लिग क्रिकेटमा टेक्सास सुपर किङ्सबाट खेल्दै आएका छन् । नेदरल्यान्ड्सको द हेगमा क्यानडाविरुद्ध खेल्दै उनले अमेरिकाबाट एकदिवसीय अन्तर्राष्ट्रिय क्रिकेटमा ‘डेब्यू’ गरेका थिए ।

सन् २०२५ को सेप्टेम्बरमा मिलिन्दले नामिबियाको विन्डहकमा नामिबियाविरुद्ध अविजित ७४ र यूएईविरुद्ध अविजित एक सय ५५ रन बनाएका थिए । यसै वर्षको मे महिनामा उनले क्यानडाविरुद्ध अविजित एक सय १५ र ओमानविरुद्ध ६८ रन बनाएका थिए । त्यसपछि उनी आईसीसीको महिनाको उत्कृष्ट खेलाडीको मनोनयनमा पनि परेका थिए ।

हाल चलिरहेको विश्वपक लिग–२ मा उनी सर्वाधिक रन बनाउने खेलाडीको सूचीमा तेस्रो स्थानमा छन् । उनले २० खेलमा ५८ माथिको औसत र एक सयभन्दा माथिको स्ट्राइक रेटमा कूल आठ सय २३ रन बनाइसकेका छन् । 

यसक्रममा उनले दुई शतक र ६ अर्धशतक पनि प्रहार गरिसकेका छन् । उनको नाममा २७ विकेट पनि रहेको छ ।