०३ साउन २०८३, आइतबार
संयुक्त अरब इमिरेट्स (यूएई) मा जारी आईसीसी क्रिकेट विश्वकप लिग–२ शृंखलाको अघिल्ला तीन खेलमा बिर्सनलायक प्रदर्शन गरेको नेपाली टोलीले बुधबार आफ्नो चौथो तथा अन्तिम खेल खेल्दैछ ।
नेपाली टोलीले चौथो खेलमा आयोजक यूएईको सामना गर्नेछ । नेपाल र यूएईबीचको खेल दुबईस्थित आईसीसी एकेडेमी ग्राउन्डमा नेपाली समय अनुसार, बिहान ११:१५ बजे शुरू हुनेछ ।
नेपाल र यूएईबीचको यो खेल लिग–२ प्रतियोगिताको १५औँ शृंखलाको अन्तिम खेल पनि हो । लिग–२ प्रतियोगितामा नेपाली टोलीका लागि भने यो पाँचौँ शृंखला हो । यो शृंखलामा नेपाली टोलीको प्रदर्शन अत्यन्तै निराशाजनक देखिएको छ ।
यो शृंखला शुरू हुनुअघि नेपाली टोलीले टी–२० शृंखलामा पहिलो पटक टेस्ट राष्ट्र वेस्ट इन्डिजलाई हराएको थियो । त्यसलगत्तै नेपाली टोलीले आईसीसी टी–२० विश्वकपको छनोट प्रतियोगितामा समेत अब्बल प्रदर्शन गर्दै तेस्रोपटक विश्वकपमा स्थान बनाउन सफल भएको थियो ।
वेस्ट इन्डिजविरुद्धको शृंखला र विश्वकप छनोट प्रतियोगितामा आफ्नो टोलीको उत्कृष्ट प्रदर्शनबाट हौंसिएका नेपाली समर्थक लिग–२ प्रतियोगिताको बिर्सनलायक प्रदर्शनबाट भने निराश बनेका छन् ।
किनभने, आईसीसी एकदिवसीय विश्वकपमा स्थान बनाउन र एकदिवसीय अन्तर्राष्ट्रिय मान्यता जोगाउन लिग–२ प्रतियोगिता निकै महत्वपूर्ण छ । यति महत्वपूर्ण प्रतियोगितामा नेपाली खेलाडीले खराब प्रदर्शन गर्दा समर्थकको मन कुँडिनु स्वाभाविक पनि हो ।
आठ टोली सहभागी लिग–२ प्रतियोगिताको अंक तालिकामा सातौँ स्थानमा रहेको नेपालले यूएईमा भ्रमणपछि आफ्नो अवस्थामा सुधार ल्याउने अनुमान गरिएको थियो । तर, नेपाली टोली जारी लिग–२ शृंखलाको अघिल्ला तीनवटै खेलमा पराजित भएको छ ।
त्यसैले आयोजक यूएईविरुद्धको अन्तिम खेलमा जित हात पार्दै कम्तिमा दुई अंक जोड्न सके पनि यसले समर्थकलाई केही राहत दिनेछ । यो शृंखलामा नेपाली खेलाडीको ब्याटिङ, बलिङ र फिल्डिङ तीनवटै पक्ष कमजोर देखिएको छ ।
नेपाली टोली अमेरिका विरुद्धको पहिलो खेलमा दुई सय ६३ रनको लक्ष्य पछ्याउन पनि असफल देखिएको थियो । त्यो खेलमा नेपाली टोलीका बलरले औसत प्रदर्शन गरेका थिए । ५० ओभरको खेलमा अमेरिकाले दिएको लक्ष्य मध्यम थियो ।
तर, नेपाली ब्याट्सम्यानको प्रदर्शन भने निराशाजनक रह्यो । नेपाली टोलीका कुनै पनि ब्याट्सम्यान ४० रनभन्दा माथि उक्लन सकेनन् । आफ्नो पालीमा नेपाली टोलीका ब्याट्सम्यान एकपछि अर्को गर्दै मैदान प्रवेश गर्ने र लगत्तै पेभेलियन फर्कनेक्रम जारी रह्यो ।
परिणाम स्वरूप सिङ्गो नेपाली टोली ३९.१ ओभरमा केवल एक सय ५६ रन बनाउँदै अलआउट भयो । समग्रमा उक्त खेलमा ब्याट्सम्यानहरूको कमजोर प्रदर्शन नै नेपाली टोलीको हारको कारण बन्न पुगेको थियो ।
विडम्बना, आफ्नो दोस्रो खेलमा नेपाली टोली आयोजक यूएईसँग पनि पाँच विकेटले पराजित हुन पुग्यो । यो खेलमा नेपाली नेपाली टोलीको ब्याटिङमै समस्या देखियो । पहिले ब्याटिङ गरेको नेपाली टोलीले निर्धारित ५० ओभरमा सबै विकेट गुमाएर दुई सय ३३ रनमात्र बनाउन सक्यो ।
माथिल्लो क्रमका ब्याट्सम्यान एकपछि अर्को गर्दै पेभेलियन फर्कनेक्रम जारी रह्यो । माथिल्ला तीनमध्ये दुई ब्याट्सम्यानले त दोहोरो अंकमा समेत रन बनाउन सकेनन् । धन्न, चौथो नम्बरमा क्रिज समाल्न आएका कप्तान रोहित पौडेलले शतकीय पाली खेलेर नेपाली टोलीलाई केही राहत दिए ।
उक्त खेलमा नेपाली टोलीका ६ ब्याट्सम्यानले त दोहोरो अंकमा समेत रन बनाउन सकेनन् । रोहितबाहेक कुनै पनि ब्याट्सम्यान ३५ रनभन्दा अगाडि बढ्न सकेनन् । नेपाली ब्याट्सम्यानले ‘पावर प्ले’ मा पनि रन बनाउन सकेनन् भने एकपछि अर्को गर्दै विकेट पनि गुमाइरहे ।
समर्थकका लागि यो अर्को विश्वासिलो क्षण थियो । जवाफी ब्याटिङमा ओर्लिएको यूएईका ब्याट्सम्यानले पनि उत्कृष्ट प्रदर्शन गरे । दुवै ओपनरले ‘पावर प्ले’को भरपुर फाइदा उठाउँदै ६३ रनको साझेदारी गरे ।
८.२ ओभरमा पहिलो विकेट गुमाउनुअघि नै यूएईले सातभन्दा पनि माथिको रन रेटमा ६३ रन बनाउँदै आफ्नो अवस्थालाई मजबुत पारिसकेको थियो । ओपनरद्वय आर्यान्श शर्मा (९८ रन) र एलिसन सराफु (४५ रन)ले आक्रामक पाली खेल्दै यूएईको जितको आधार तयार पारेका थिए ।
टोली जितबाट टाढिँदै गएको अवस्थामा नेपाली बलरले पुनरागमनको झिनो प्रयास गरे पनि उनीहरू त्यसमा सफल भएनन् । नेपालले यूएईलाई दिएको लक्ष्य नै कम थियो । अन्तत: यूएईले ४३.३ ओभरमा पाँच विकेट गुमाएर विजयलक्ष्य पूरा गरेको थियो ।
अमेरिकाविरुद्धको तेस्रो खेलमा नेपाली टोलीका ब्याट्सम्यानले केही निखारिएको प्रदर्शन गरे पनि बलरहरूको प्रदर्शन भने कमजोर देखियो । त्यो खेलमा नेपाली टोलीले फिल्डिङमा पनि निकै कमजोर प्रदर्शन गरेको थियो ।
उक्त खेलमा पहिले ब्याटिङ गरेको नेपालले ४९.५ ओभरमा अलआउट हुनुअघि दुई सय ७१ रन बनाएको थियो । समग्रमा नेपाली ब्याट्सम्यानको प्रदर्शन सन्तोषजनक नै थियो । दीपेन्द्रसिंह ऐरीले ७५ रन बनाएका थिए भने ओपनर कुशल भुर्तेलले ४७ र भीम सार्कीले ४३ रन जोडेका थिए ।
कप्तान रोहित पौडेलले पनि ३६ रन बटुलेका थिए । तर, यो खेलमा महत्वपूर्ण तल्लो क्रमका ब्याट्सम्यान करण केसीले खेले । उनले आक्रामक ब्याटिङ गर्दै ३१ ब्लमा तीन छक्का र दुई चौकाको मद्दतले ४९ रन बनाएपछि नेपाली टोलीको स्कोर सम्मानजनक अवस्थामा पुगेको थियो ।
अघिल्ला खेलमा जस्तै अमेरिकाविरुद्धको यो खेलमा पनि ओपनिङ जोडीले भने नेपाललाई गतिलो शुरूआत दिन सकेको थिएन । यो खेलमा खराब फिल्डिङ नेपाली टोलीको हारको कारण बन्न पुग्यो । नेपाली फिल्डरले महत्वपूर्ण क्षणमा केही क्याच छुटाउनु नै हारको प्रमुख कारण थियो ।
यद्दपि, बलरहरूको प्रदर्शन पनि सोचेजस्तो रहेन । तर, यो खेलमा विजयलक्ष्य पूरा गर्न अमेरिकाले ठुलै संघर्ष गर्नु परेको थियो । अमेरिकी टोलीले ४९ ओभरमा ६ विकेट गुमाएर विजयलक्ष्य पूरा गरेको थियो ।
अझ रमाइलो पक्ष त के हो भने, लिग–२ शृंखला शुरू हुनुभन्दा ठिकअघि नेपालले आईसीसी टी–२० विश्वकपको अन्तिम चरणको छनोट प्रतियोगितामा यूएईको यही टोलीलाई हराएको थियो ।
२० ओभरको त्यो खेलमा नेपालले ६ विकेट गुमाएर एक सय ४० रन बनाएको थियो । तर, यूएईलाई एक सय ३९ रनमै रोक्दै एक विकेटको रोमाञ्चक जित हासिल गरेका थियो । एसिया–प्रशान्त क्षेत्रको उक्त छनोट प्रतियोगितामा नेपाल लगातार ६ खेल जित्दै च्याम्पियन बनेको थियो ।
तर, एकदिवसीय ढाँचाको प्रतियोगितामा भने नेपाली खेलाडीले सोही अनुरूपको प्रदर्शन गर्न सकेको पाइँदैन । त्यसको प्रमुख कारण नेपाली खेलाडीहरू छोटो ढाँचाको क्रिकेट (खासगरी फ्रेन्चाइज प्रतियोगिता)मा अभ्यस्त हुनु र घरेलु क्रिकेटमा लामो ढाँचाको प्रतियोगिताको अभाव हुन हो ।
त्यसैको असर लिग–२ जस्ता ५० ओभरमा महत्वपूर्ण अन्तर्राष्ट्रिय प्रतियोगिताहरूमा झल्कन्छ । त्यसैले आगामी दिनमा देशभित्र बढीभन्दा बढी लामो ढाँचाको (अझ सम्भव भएसम्म तीन दिवसीय) प्रतियोगिताहरू आयोजना गर्नेतर्फ सम्बन्धित निकायको ध्यान जानु आवश्यक देखिन्छ ।
एकदिवसीय अन्तर्राष्ट्रिय प्रतियोगितामा नेपालका लागि यूएई पूर्वपरिचित प्रतिद्वन्द्वी हो । नेपाल र यूएईबीच हालसम्म १६ वटा एकदिवसीय अन्तर्राष्ट्रिय खेलिएको छ । यो तथ्याङ्कलाई हेर्दा यूएईभन्दा नेपाल बलियो देखिन्छ । नेपालले नौ खेलमा यूएईलाई हराएको छ ।
यूएईले भने सात खेलमा नेपाललाई पराजित गरेको छ । घरेलु मैदानमा यी दुवै टोलीले पाँच–पाँच खेल जितेका छन् । नेपालले तीन खेलमा यूएईलाई उसैको घरेलु मैदानमा हराएको छ । यूएईले भने नेपालको घरेलु मैदानमा एक खेलमात्र जित्न सकेको छ । ‘न्यूट्रल भेन्यू’ मा नेपाल र यूएईले एक–एक खेल जितेका छन् ।
नेपाल र यूएईबीच पहिलो एकदिवसीय अन्तर्राष्ट्रिय सन् २०१८ को अगस्त ३० तारिखमा खेलिएको थियो । क्वालालम्पुरमा खेलिएको उक्त खेलमा यूएईले नेपाललाई ७८ रनले हराएको थियो । यी दुई टोलीबीच खेलिएको पछिल्ला पाँच एकदिवसीय अन्तर्राष्ट्रियमा नेपालले चार र यूएईले एक खेल जितेका छन् ।
लिग–२ को यो शृंखलामात्र होइन, यसअघिका शृंखलामा पनि नेपाली टोलीको प्रदर्शन खासै सन्तोषजनक देखिँदैन । त्यसैको प्रतिफल हो, आठ टोली सहभागी लिग–२ तालिकामा नेपाली टोली सातौँ स्थानमा आसिन छ ।
लिग–२ प्रतियोगिताको दोस्रो संस्करणमा १९ खेल खेलेको नेपालले पाँच खेलमात्र जित्न सकेको छ । १२ खेलमा पराजित भएको नेपाली टोलीको दुई खेल भने अनिर्णित रुपमा सकिएको छ । नेपालले हालसम्म १२ अंकमात्र बटुल्न सकेको छ ।
यूएई भने १९ खेलबाट आठ अंक जोड्दै तालिकाको आठौँ स्थानमा छ । यूएईले चार जीत र १५ हारको नतिजा निकालेको छ । यूएई भ्रमणका क्रममा चारवटै खेल जित्दै आठ अंक जोडेको अमेरिका तालिकाको पहिलो स्थानमा छ ।
अमेरिकाले २४ खेलबाट ३६ अंक जोडेको छ । अमेरिकाले हालसमम १८ जित र ६ हारको नतिजा निकालेको छ । २४ खेलबाट ३० अंक बटुलेको स्कटल्यान्ड दोस्रो र समान खेलबाट २८ अंक जोडेको नेदरल्यान्ड्स तेस्रो स्थानमा छन् ।
यसैगरी, २० खेलबाट २४ अंक हात पारेको ओमान चौथो, २४ खेलबाट २१ अंक बटुलेको क्यानडा पाँचौँ र २४ खेलबाट १९ अंक कमाएको नामिबिया छैटौँ स्थानमा आसिन छन् ।
सहभागी टोलीहरूका लागि आईसीसी क्रिकेट विश्व कप लिग–२ प्रतियोगिता निकै महत्त्वपूर्ण छ । यो प्रतियोगिता सन् २०२७ मा आयोजना हुने आईसीसी एकदिवसीय विश्वकपका लागि छनोटको आधारका रुपमा पनि रहेको छ ।
सन् २०२७ को एकदिवसीय विश्वकप दक्षिण अफ्रिका, जिम्बावे र नामिबियामा संयुक्त रुपमा आयोजना हुँदैछ । लिग–२ प्रतियोगिताको समाप्तिपछि अंक तालिकाको माथिल्लो चार स्थानमा रहने राष्ट्र सिधै उक्त एकदिवसीय विश्वकपको अन्तिम चरणको छनोटमा प्रवेश गर्नेछन् ।
लिग–२ तालिकाको अन्तिम चार स्थानमा रहने राष्ट्रले भने विश्वकप क्वालिफायरका लागि प्ले–अफ चरण खेल्नु पर्नेछ । यसका अतिरिक्त, अन्तर्राष्ट्रिय क्रिकेट काउन्सिल (आईसीसी)बाट सन् २०१८ मा प्राप्त एकदिवसीय मान्यता जोगाउन पनि यो प्रतियोगिताको महत्त्वपूर्ण भूमिका रहन्छ ।
हाल आईसीसीबाट अस्थायी रूपमा एकदिवसीय मान्यता पाएका नेपालसहितका एसोसिएट्स सदस्य राष्ट्रको उक्त मान्यता सन् २०२६ को विश्वकप छनोटसम्म कायम रहने छ । यो सूचीमा स्कटल्यान्ड, यूएई, नेदरल्यान्ड्स, नामिबिया, ओमान, अमेरिका र क्यानडा पनि रहेका छन् ।
लिग–२ प्रतियोगिताको दोस्रो संस्करणमा सहभागी आठवटै राष्ट्रले ३६–३६ खेल खेल्नेछन् । प्रत्येक राष्ट्रले घरेलु मैदानमा तीनवटा शृंखला खेल्नेछन् भने ६ वटा शृंखला अन्य राष्ट्रको मैदानमा खेल्नेछन् । नेपालले अर्को शृंखला सन् २०२६ को मार्चमा खेल्नेछ । उक्त शृंखलामा नेपालका अतिरिक्त ओमान र यूएईको सहभागिता रहनेछ ।
