३२ असार २०८३, बिहीबार
समकालीन विश्व फुटबलका महान खेलाडीमध्येका एक क्रिस्टियानो रोनाल्डोले आगामी फिफा विश्वकप आफ्नो लागि अन्तिम हुने घोषणा गरेका छन् ।
फिफा विश्वकपको २३औँ संस्करण सन् २०२६ को जुन ११ देखि जुलाई १९ तारिखसम्म अमेरिका, मेक्सिको र क्यानडामा संयुक्त रुपमा आयोजना हुँदैछ ।
‘मेरा लागि सन् २०२६ को विश्वकप अन्तिम हुनेछ । त्यसपछिको विश्वकपमा म उपस्थित हुने छैन,’ ४० वर्षीय पोर्चुगिज स्ट्राइकर रोनाल्डोले भनेका छन् ।
रोनाल्डो आफ्नो राष्ट्र र क्लबहरुका लागि नौ सय ५३ गोल गर्ने खेलाडी हुन् । उनले आगामी एक–दुई वर्षभित्र सक्रिय खेलजीवनबाट सन्न्यास लिने पनि बताएका छन् ।
तर, उनले सन्न्यासको निश्चित समय भने किटान गरेका छैनन् । यद्दपि, आगामी फिफा विश्वकपमा पोर्चुगल अझै छनोट भइसकेको छैन ।
रोनाल्डोले हालसम्म पाँचवटा विश्वकप खेलिसकेका छन् । आगामी विश्वकप उनको छैटौँ हुनेछ । उनी हाल साउदी अरेबियन क्लब अल–नासरबाट व्यवसायीक फुटबल खेल्छन् ।
रोनाल्डो अन्तर्राष्ट्रिय फुटबलमा सबैभन्दा बढी गोल गर्ने खेलाडी पनि हुन् । अन्तर्राष्ट्रिय फुटबलमा उनले हालसम्म एक सय ४३ गोल गरेका छन् ।
सक्रिय खेलजीवनमा भने उनी एक हजार गोलको दूर्लभ कोशेढुङ्गा पूरा गर्ने अभियानमा छन् । रोनाल्डोले विश्वका चर्चित क्लबहरुबाट ब्यवसायीक फुटबल खेलेका छन् ।
उनले इङ्लिस प्रिमियर लिग क्लब म्यानचेस्टर युनाइटेड, स्पेनिस क्लब रियल म्याड्रिड र इटालियन सिरिए क्लब युभेन्ट्सबाट ब्यवसायीक फुटबल खेल्दै अब्बल प्रदर्शन गरिसकेका छन् ।
