नेकपा (एमाले)को एघारौं महाधिवेशनको सरगर्मी विस्तारै बढ्न थालेको छ । मंसिर २७ देखि काठमाडौंमा शुरू हुने महाधिवेशनको मिति नजिकिएसँगै विभिन्न पदका आकांक्षी नेताहरू आफ्नो पक्षमा माहोल बनाउन दौडधूपमा लागेका हुन् । 

कोशी प्रदेशका तीन नेता केन्द्रीय सचिव पदको दौडमा देखिएका छन् । कोशीका मुख्यमन्त्रीसमेत रहेका नेता हिक्मत कार्की, पूर्वमुख्यमन्त्री शेरधन राई र नेता विनोद ढकाल सचिव पदका दाबेदार देखिएका हुन् । कोशी एमाले अध्यक्ष केपी शर्मा ओलीको गृह प्रदेश पनि हो ।

यसबाहेक कोशी प्रदेशबाटै ८ नेता पदाधिकारीका आकांक्षी छन् । उपाध्यक्ष गुरु बराल, सचिव योगेश भट्टराई, राजेन्द्र गौतम, भानुभक्त ढकाल, अग्नि खरेललगायतका नेताहरू पदाधिकारीका दाबेदार रहेको एमाले नेताहरू बताउँछन् । 

मुख्यमन्त्री कार्की पछिल्लो समय पूर्वका पहाडी जिल्लामा आफ्नो गतिविधि बढाउँदै छन् । कार्की आफ्नो दाबेदारी बलियो बनाउन इलाम र धनकुटामा पार्टीका कार्यक्रममा व्यस्त छन् ।  

केन्द्रीय सदस्य उषाकला राईलगायत नेताहरूले कार्कीलाई पहिचान पक्षधरसँग सम्बन्ध सुधार्न जिल्ला जान सुझाएको एमालेकै नेताहरू बताउँछन् ।

केही दिनअघि मात्रै आफूनिकट पत्रकारहरूलाई एक होटलमा बोलाएर कार्कीले सचिव पदमा उम्मेदवारी दिने घोषणा गरेको स्रोत बताउँछ । यद्यपि, कुन पदमा भन्ने पक्का नभए पनि स्थायी कमिटी सदस्य भइसकेको व्यक्तिले माथिल्लो पदमा दाबी गर्नु स्वाभाविक भएको उनका राजनीतिक सल्लाहकार रवि खनालले बताए । ‘अहिलेसम्म उहाँले औपचारिक घोषणा त गर्नुभएको छैन, तर अहिलेको पदभन्दा माथि जान स्वाभाविक रूपमा बल लाग्छ,’ खनालले भने । 

सचिव पदका लागि कार्कीका प्रतिस्पर्धीका रूपमा कोशी प्रदेशका संस्थापक मुख्यमन्त्री तथा पार्टीका प्रदेश इन्चार्ज शेरधन राई पनि देखिएका छन् । उनले पदाधिकारीमा आफ्नो उम्मेदवारी रहने निश्चित भएको बताए । ‘मैले नेतृत्वसँग कुरा गरेको छैन, काठमाडौं फर्केर छलफल गर्छु,’ राईले भने, ‘कुन पद भन्ने टुङ्गो छैन, तर पदाधिकारीमा मेरो उम्मेदवारी हुन्छ ।’ 

राई र कार्की दुवै अध्यक्ष ओलीनिकट मानिन्छन् । १५ सदस्यीय पदाधिकारीमा दुवैलाई समेट्न ओलीलाई सकस पर्ने नेताहरू बताउँछन् । तर, पदाधिकारी संख्या बढाएर १८ पुर्‍याउने गरी छलफल चलिरहेकाले दुवै जना अट्न सक्ने सम्भावना पनि रहेको एक केन्द्रीय सदस्यले बताए । 

यसैबीच, पूर्वराष्ट्रपति विद्यादेवी भण्डारीनिकट मानिने नेता विनोद ढकाल पनि सचिव पदका दाबेदार देखिएका छन् । कुनै समय अध्यक्ष ओलीका विश्वासपात्र रहेका ढकाल, नेकपा विभाजनका बेला पार्टी नफुटाउन सुझाव दिएपछि ओलीसँग टाढिएका थिए । 

एमाले प्रदेश कमिटीको अध्यक्षको चुनावमा शेरधन राई र हिक्मत कार्की मिलेरै ढकाललाई हराएका थिए । त्यतिबेला मुख्यमन्त्री कार्कीले ढकालनिकटका सांसदलाई मन्त्री बनाउने आश्वासन दिए पनि पूरा नगर्दा उनीसँग असन्तुष्टि बढेको थियो ।

उक्त पराजयको बदला ढकालले मोरङ जिल्ला अधिवेशनमा संस्थापन पक्षविरुद्ध अप्रत्याशित नतिजा निकालेका थिए । 

केन्द्रीय सदस्य युवराज बास्कोटाले सचिव पदका लागि ढकालको नाम पहिलो नम्बरमा आउने दाबी गरे । ‘विनोदजीको नाम सचिवमा पहिलो नम्बरमा रहन्छ, उहाँको पनि पार्टीमा ठूलो योगदान छ,’ भण्डारीनिकट नेता बास्कोटाले भने ।

भण्डारी पक्षका नेताहरूले ढकाललाई पूर्वको मियो भनेर चर्चा गर्ने गरेका छन् । ‘हामी सिपाहीले कमान्डर बचाउने हो । हामी उहाँलाई यो पद, मर्यादा र हैसियतमा उभ्याउन लागेका छौं,’ बास्कोटाले भने ।