०२ साउन २०८३, शनिबार
‘बक्सिङ डे’ टेस्ट क्रिकेटको पहिलो दिन शुक्रबार घरेलु टोली अस्ट्रेलियाका ब्याट्सम्यान भ्रमणकारी टोली इङ्ल्यान्डका बलरसामू निरीह बनेका छन् ।
मेलबर्नमा जारी चौथो टेस्टमा टस हारी ब्याटिङको निम्तो पाएको अस्ट्रेलिया पहिलो पालीमा केवल एक सय ५२ रन बनाउँदै अलआउट भयो ।
अस्ट्रेलियन टोली ४५.२ ओभरमै अलआउट भयो । अस्ट्रेलियाका कुनै पनि ब्याट्सम्यान लामो समय क्रिजमा टिक्न सकेनन् ।
अस्ट्रेलियाका लागि माइकल नेसरले सर्वाधिक ३५ रन बनाए । उस्मान ख्वाजा २९ रन बनाउँदै पेभेलियन फर्किए । विकेटकिपर ब्याट्सम्यान एलेक्स केरीले २० रन जोडे ।
क्यामर ग्रिन पनि १७ रनभन्दा अगाडि बढ्न सकेनन् । ओपनर ट्राभिस हेड १२ रनमै आउट भए । अस्ट्रेलियाले आफ्ना अधिकांश ब्याट्सम्यानले बनाएभन्दा बढी रन अतिरिक्त रूपमा पाएको थियो ।
अस्ट्रेलियाले अतिरिक्त रूपमा १३ रन पायो । इङ्ल्यान्डका बलर जोस टङ् एक्लैले पाँच विकेट लिए । उनले ११.२ ओभरमा दुई मेडन राख्दै ४५ रन खर्चिए ।
गस एटकिन्सनले पनि दुई विकेट हात पारे । ब्राइडन कार्स र बेन स्टोक्सले पनि एक–एक विकेट लिए । पाँच टेस्टको एसेस शृंखला भने अस्ट्रेलियाले यसअघि नै जितिसकेको छ । शृंखलामा अस्ट्रेलिया ३–० ले अगाडि छ ।
