नेपाली कांग्रेसको विशेष महाधिवेशनले पार्टीका नेताहरूलाई राष्ट्रपति, प्रधानमन्त्रीदेखि सांसदसम्म लाभका पद लिन कार्यकालको सीमा तोक्ने भएको छ ।

पार्टी महामन्त्री विश्वप्रकाश शर्माले बन्दसत्रमा पेश गर्ने गरी तयार पारेको सांगठनिक प्रतिवेदनमा सो विषय उल्लेख छ ।

'एकपटक राष्ट्रपति, २ पटक प्रधानमन्त्री, ३ पटक मन्त्री र ४ पटक मात्र सांसद बन्न पाउने विषय प्रतिवेदनमा छ,' शर्मानिकट स्रोतले लोकान्तरसँग भन्यो ।

उनले यो विषयलाई पार्टीको विधान महाधिवेशनमा पनि प्रस्ताव गरेका थिए । तर, पारित हुन सकेको थिएन ।

साथै, सांगठनिक प्रतिवेदनमा पार्टीका हरेक कमिटीमा युवा प्रतिनिधित्व सुनिश्चित गर्ने विषय समावेश छ ।

'केन्द्रदेखि वडासम्मै ३० वर्षमुनि र ३० देखि ४० वर्ष उमेर समूहका युवालाई क्लस्टर नै तोकेर प्रतिनिधित्व सुनिश्चित गर्ने विषय प्रतिवेदनमा उल्लेख छ,' स्रोतले भन्यो, 'दुवै उमेर समूहबाट केन्द्रमा २०-२०, प्रदेशमा १०-१०, जिल्ला, क्षेत्र र पालिकामा ६-६ तथा वडामा ४-४ जनाको प्रतिनिधित्व सुनिश्चित हुनेछ ।'

पदाधिकारीको संरचनालाई यथावत् छाडिएको स्रोतले बतायो ।

विदेशस्थित जनसम्पर्क समितिहरूको हकमा भने छुट्टै संरचना प्रस्ताव गरिएको छ ।

'जनसम्पर्क समितिहरूबाट छुट्टै अन्तर्राष्ट्रिय संरचना बनाउने विषय प्रतिवेदनमा छ,' स्रोतले भन्यो, 'प्रत्येक देशको वर्तमान र पूर्व अध्यक्ष मध्येबाट २७ सदस्यीय अन्तर्राष्ट्रिय जनसम्पर्क परिषद् रहने छ ।'

साथै, पार्टीमा 'ल्याटरल इन्ट्री'को व्यवस्था गर्ने प्रस्ताव पनि गरिएको छ ।

यसअघि कांग्रेसमा तल्ला कमिटीहरूबाट अगाडि बढ्दै नेता बन्ने पद्धति मात्र रहेकोमा अब विभिन्न पेशा-व्यवसाय वा बुद्धिजीवीहरूबाट योग्य व्यक्तिहरूलाई सिधा 'इन्ट्री'को व्यवस्था गर्न लागिएको हो ।

पार्टीका ५४ प्रतिशतभन्दा बढी महाधिवेशन प्रतिनिधिको मागलाई नेतृत्वले लत्याएपछि महामन्त्रीद्वय गगन थापा र विश्वप्रकाश शर्माको अगुवाइमा विशेष महाधिवेशन भइरहेको हो ।