२१ असार २०८३, आइतबार
अख्तियार दुरुपयोग अनुसन्धान आयोगले राप्ती स्वास्थ्य विज्ञान प्रतिष्ठानका तत्कालीन उपकुलपति प्राडा संगीतासिंह भण्डारीसहित १९ जनाविरुद्ध भ्रष्टाचार मुद्दा दायर गरेको छ ।
प्रतिष्ठानका लागि सीटी स्क्यान मशिन खरिद गर्दा गुणस्तरहीन तथा सर्त एवं मापदण्डविपरीत आपूर्ति गरेको आरोपमा बिहीबार विशेष अदालतमा मुद्दा दायर गरिएको आयोगले जनाएको छ । साथै आयोगले एक कम्पनी हिमालयन मेडिटेक प्रालिलाई पनि प्रतिवादी बनाएको छ ।
प्रतिष्ठानका लागि सीटी स्क्यान मशिन खरिद गर्दा उनीहरूले ७ करोड ३१ लाख ८२ हजार ९८५ रुपैयाँको गैरकानूनी लाभ वा हानि पुर्याई भ्रष्टाचार गरेको आयोगद्वारा जारी विज्ञप्तिमा उल्लेख छ ।
आयोगले भण्डारीसहित प्रतिष्ठानका तत्कालीन कामु रजिस्ट्रार तथा डेपुटी फाइनान्स म्यानेजर कैलाशप्रसाद देव र तत्कालीन निर्देशक डा. सागर पन्थी, रेडियोलोजी विभागका प्रमुख डा. बोम बीसी, बायोमेडिकल इन्जिनियरद्वय शरद भण्डारी र आशुतोष भण्डारीविरुद्ध पनि मुद्दा दायर गरेको छ ।
त्यसैगरी, त्रिभुवन विश्वविद्यालय शिक्षण अस्पताल महाराजगञ्ज, काठमाडौंका बायोमेडिकल इन्जिनियर अमितकुमार चौधरी, प्रतिष्ठानका तत्कालीन शाखा अधिकृत झन्कार लामिछाने, लिलाकुमारी देवकोटा र मेघबहादुर अधिकारी, तत्कालीन लेक्चरर डा श्रीसिया पोखरेल, आईटी अफिसर हिरालाल भण्डारीलाई पनि आयोगले प्रतिवादी बनाएको छ ।
त्यसैगरी, प्रतिष्ठानका तत्कालीन लेखा अधिकृत राजीव बस्नेत, फिजियोथेरापिस्ट पूजा ठाकुर, कम्प्युटर असिस्टेन्ट सतिशबहादुर शाही, फार्मेसी सुपरभाइजर कृष्णप्रसाद जोशी र स्टाफ नर्स विन्दु पौडेललाई प्रतिवादी कायम गरिएको छ ।
त्यसैगरी, हिमालयन मेडिटेक प्रालि तथा उक्त कम्पनीका मुख्य भई कार्य गर्ने अमर श्रेष्ठ र सञ्जु राजकर्णिकारलाई पनि प्रतिवादी कायम गरिएको छ ।
तत्कालीन उपकुलपति प्राडा संगीतासिंह भण्डारीविरुद्ध आयोगले यस अघि पनि दायर गरेको एउटा भ्रष्टाचारको मुद्दा विशेष अदालतमा विचाराधीन छ ।
यस्तो छ अभियोग पत्र :
