०४ साउन २०८३, सोमबार
प्यालेस्टाइन फुटबल संघ (पीएफए)को उजुरीका आधारमा विश्व फुटबल महासंघ (फिफा)ले इजरायली फुटबल संघलाई एक लाख ४१ हजार सात सय पाउण्ड जरिवाना तिराउने निर्णय गरेको छ ।
इजरायली फुटबल संघले आफूमाथि भेदभाव र जातीय दूर्व्यवहार गरेको उजुरी पीएफएले सन् २०२४ को मेमा आयोजित फिफाको ७४औँ साधारणसभामा दर्ता गराएको थियो । सोही उजुरीमाथि छानबिनपछि फिफाले इजरायली फुटबल संघलाई जरिवाना तिराउने निर्णय गरेको हो ।
फिफाले इजरायली फुटबल संघलाई आगामी दिनमा आफ्नो आचरण सुधार्न गम्भीर चेतावनी पनि दिएको छ । फिफाका अनुसार, इजरायली फुटबल संघले फिफा अनुशासन संहिताको धारा १३ र १५ उल्लंघन गरेको पुष्टि भएको छ ।
धारा १३ मा आपराधिक व्यहार र निष्पक्ष खेलको सिद्धान्तको उल्लंघन र धारा १५ मा भेदभाव र जातिवादी दूर्व्यवहारको विषयमा उल्लेख गरिएको छ ।
इजरायल फुटबल संघले आगामी तीन घरेलु खेलमा आफ्नो लोगोसँगै ‘फुटबलले विश्वलाई एकताबद्ध गर्छ : भेदभावलाई निषेध गर्छ’ भन्ने नारा लेखिएको ठुला ब्यानरहरू पनि राख्नु पर्नेछ ।
यसका अतिरिक्त, इजरायल फुटबल संघले आगामी दिनमा भेदभावका घटनाहरू रोक्न विशेष कार्यक्रम पनि सञ्चालन गर्नु पर्नेछ ।
यसैबीच, प्यालेस्टाइन फुटबल संघले मध्य–पूर्वमा जारी द्वन्द्वका कारण यसै महिनाको अन्त्यमा मोरक्कोमा खेल्ने तय भएको मौरिटानिया र बेनिनविरुद्धको खेल रद्द गरिएको जनाएको छ ।
