‘वन ग्लोबल माइल’ अभियानअन्तर्गत आगामी असार २७ गते ‘कोहलपुर माइल’ दौड आयोजना हुने भएको छ । हरेक वर्ष जुलाई ११ तारिखमा आयोजना हुने ‘वन ग्लोबल माइल’ विश्वभर रनिङ संस्कृति प्रवर्द्धन गर्ने अभियान हो ।

‘एक माइल, एक दिन, एक विश्व’ नारासहित यो वर्ष एक दर्जनभन्दा बढी देशमा एकैपटक एक माइल दौड आयोजना हुन लागेको हो । यसअन्तर्गत नेपालमा कोहलपुर माइल दौड आयोजना गरिने रेस डाइरेक्टर चन्द्रबहादुर गुरुङले जानकारी दिए ।

डेढ किलोमिटरको रोड रेस भएकोले यसमा सबै उमेर समूहका धावकले सहभागिता जनाउने पाउने पनि उनले बताए । रेस नेपालको आयोजनामा हुने यो दौडको व्यवस्थापन भने नेपालगञ्ज म्याराथन टिमले गर्ने बताइएको छ ।

वर्ल्ड रनिङको साझा संस्था एसोसियसन अफ इन्टरनेसनल म्याराथन एण्ड डिस्टेन्स रेस (एम्स)ले यसलाई आधिकारिक रुपमा प्रवर्द्धन गरेको छ । कोहलपुर माइल पनि नेपालगञ्ज म्याराथन सिरिजअन्तर्गत रहने बताइएको छ ।

नेपालगञ्ज म्याराथन सिरिजमा यसअघि नै नेपालगन्ज १० म्युजिक नाइट रन, काठमाडौं २५के हेरिटेज रेस, कर्णाली हाफ म्याराथन, गौघाट ग्रीन रन, राप्तीसोनारी नेचर रनलगायतका दौड प्रतियोगिता सञ्चालनमा रहेका छन् ।

वन ग्लोबल माइलमा सहभागी हुन एम्सको आबद्धता अपरिहार्य रहेको एम्सकादूत टीएस ठकुरीले जानकारी दिए ।