२५ जेठ २०८३, सोमबार
इन्डियन प्रिमियर लिग (आईपीएल) क्रिकेटको आफ्नो पछिल्लो खेलमा मुम्बई इन्डियन्सले गुजरात टाइटन्सलाई ९९ रनको फराकिलो अन्तरले हरायो ।
उक्त खेलमा मुम्बई इन्डियन्सको जितमा तिलक वर्माले शतकीय योगदान गरे । खेलका क्रममा उनले एउटा विशेष कीर्तिमान पनि बनाए । आईपीएलमा यो उनको पहिलो व्यक्तिगत शतक हो ।
उनी आईपीएलको इतिहासमा मुम्बई इन्डियन्सका लागि सबैभन्दा कम बलमा शतक पूरा गर्ने ब्याट्सम्यान पनि बने । उनले केवल ४५ बलमा शतक बनाएका हुन् ।
खेलमा उनले अविजित एक सय एक रन बनाए । वर्माले २२४ भन्दा बढीको स्ट्राइक रेटमा रन बनाएका हुन् । यसक्रममा उनले सात छक्का र आठ चौका प्रहार गरे ।
यसअघि, मुम्बई इन्डियन्सका लागि सन् २००८ को आईपीएलमा श्रीलंकाली खेलाडी सनथ जयसूर्याले पनि चेन्नई सुपर किङ्सविरुद्ध ४५ बलमै शतक पूरा गरेका थिए ।
अहिले आएर वर्माले सोही कीर्तिमानको बराबरी गरेका हुन् । उनी आईपीएलमा सबैभन्दा कम बलमा शतक पूरा गर्ने मुम्बई इन्डियन्सका एकमात्र भारतीय ब्याट्सम्यान हुन् ।
जारी सिजनको आईपीएलमा पनि वर्मा सबैभन्दा कम बलमा शतक पूरा गर्ने खेलाडी हुन् । जारी आईपीएलमा यसअघि सन्जु सामसनले ५२ बलमा शतक बनाएका थिए ।
