विराटनगर, १० चैत-सुनसरीको दुहवी नगरपालिकाका उपमेयर र वडा सदस्यबीच कुटाकुट भएको छ । नगरपालिकाकी उपमेयर सुनिता दहाल र वडा सदस्य कृष्ण योञ्जनबीच कुटाकुट भएको हो ।

दुहवी– ५ को सरस्वती माध्यामिक विद्यालयको मैदानमा उपभोक्ता समितिमार्फत भरौट भरिएको र त्यसको भुक्तानी लिनका लागि वडा अध्यक्ष रमेश रौनियार नेतृत्वको टोलीले उपमेयर सुनितालाई सदर गर्न दबाब दिँदा दुवै पक्षबीच भनाभन भएको थियो ।

त्यही विवाद बढेपछि कुटाकुट भयो । केही दिनदेखि वडा अध्यक्ष रौनियारसहितले उपमेयर दाहाललाई अनुगमन नै नगरी फाइल सदर गर्न दबाब दिँदै आएका थिए । ‘आज पनि आए, अनुगमन नगरी सदर गर्दिनँ भनेपछि गाली गलौज गरे,’ दहालले सञ्चारकर्मीसंग भनिन्, ‘एउटी महिलालाई मनोमानी ढंगले गाली गरेपछि मैले पनि सहेर बस्न सकिनँ ।’

उपमेयर सुनिताले आफूले इञ्जिनियर लगेर अनुगमन गरेपछि मात्र फाइल सदर गर्ने अडान राखेकैले वडा अध्यक्ष र सदस्यले गालीगलौज गरेको आरोप लगाइन् ।

यता वडाध्यक्ष रौनियारको कुरा भने फरक  छ । रौनियारका अनुसार उपमेयर दहालको कार्यकक्षमा दुवै पक्षबीच विवाद भएको हो । रौनियारले आफू बाहिर निस्किएपछि सदस्य यौन्जनलाई  उपमेयर दहालले हात हालेको आरोप लगाए ।

‘उपमेयरले हात हालेपछि स्थिति असहज बन्यो,’ उनले भने, ‘उपमेयर सुनिताका श्रीमान अनिल साह पनि पुग्नुभएको थियो ।’ विवाद हुँदा मेयर वेद गच्छदार पनि नगरपालिकामै थिए । यद्यपि सो घटना खाना खान निस्किएका बेला घटेको उनले बताए ।

‘दुर्भाग्यपूर्ण घटना भयो, घटनापछि दुवैपक्षलाई राखेर मिलाएको छु,’ गच्छदारले भने, ‘अब आइन्दा यस्तो घटना हुने छैन ।’ दुहवी नगरपालिकाका मेयर गच्छदार र उपमेयर दाहालबीच पछिल्लो समय खटपट छ  । उपमेयर दहाल वडाध्यक्ष र सदस्यलाई मेयरले नै आफूविरुद्ध उचालेको आरोप लगाउँछिन् । 

दुवै हाल कांग्रेस हुन् । त्यसो त विवाद भएको ५ नम्बर वडाका वडाध्यक्ष र सदस्य पनि कांग्रेसकै हुन् । यी सबै विजय गच्छदार नेतृत्वको तत्कालीन फोरम लोकतान्त्रिकबाट उम्मेदवार बनी विजयी भएका थिए । गच्छदारको पार्टी कांग्रेससंग एकीकरण भइसकेको छ ।