०४ साउन २०८३, सोमबार
काठमाडौं –प्रमुख सत्तारुढ दल नेपाल कम्युनिस्ट पार्टी (नेकपा)को स्थायी समिति बैठकमा नेता भीम रावलले पनि छुट्टै लिखित दस्तावेज पेश गरेका छन् ।
राजधानीमा केही दिनअघि सम्पन्न एसिया प्यासिफिक सम्मेलनमा सरकार सहआयोजक बनेकोमा रावलको तीव्र आक्रोश छ । धर्मपरिवर्तन गराउनका लागि गतिविधि गर्दै आएको विवादास्पद् संस्थाको कार्यक्रम नेपालमा गर्न दिएको र त्यसमा सरकार सहआयोजक बनेकोमा रावलको तीव्र असन्तुष्टि छ ।
‘मैले १४ पृष्ठ लामो लिखित धारणा पेश गरेको छु,' नेता रावलले लोकान्तरसँग भने- 'मेरो तीव्र विरोध अस्ति भर्खर आयोजना गरिएको एसिया प्यासिफिक सम्मेलनका सम्बन्धमा छ ।’
रावलले पेश गरेको दस्तावेजमा नेकपाको विधानका सम्बन्धमा उठेका विषयदेखि चुनावी घोषणापत्र, कार्यदलको प्रतिवेदन, त्यसको कार्यान्वयन लगायतका विषय समावेश छन् ।
मंगलवारको बैठकमा रावलका अलावा नेताहरू शंकर पोख्रेल, केशव बडाल, पृथ्वीसुब्बा गुरुङ, सत्यनारायण मण्डल, टोपबहादुर रायमाझी, योगेश भट्टराई र सोमनाथ अधिकारीले धारणा राखेका छन् ।
मंगलवार बिहान ८ बजेबाट शुरू भएको बैठक बिहान ११ बजे सकिएको थियो । अर्को बैठक बुधवार (भोलि) बिहान ८ बजेबाट शुरू हुने नेता रावलले जानकारी दिए ।
नेकपा स्थायी समिति बैठक मंसिर २९ गतेदेखि शुरू भएको हो ।
यसअघिको बैठकमा धारणा राख्ने क्रममा नेताहरूले नेतृत्वको चर्को आलोचना गरेका थिए । सरकारको काम कारवाहीलाई लिएर पनि नेताहरूको आक्रोश छ ।
