धनगढी- सडक क्षेत्रमा परेका संरचना हटाउन भनी पटक–पटक जारी भएको सूचनालाई अवज्ञा गरिएको भन्दै धनगढी उपमहानगरपालिकाले डोजर चलाएको छ । संरचना आफै भत्काउने घर धनीलाई सम्मान गर्ने योजना बोकेको उपमहानगरपालिकाले सूचनाको अटेरी गर्नेको संरचनामा डोजर चलाएको हो ।

बिहीबार मात्रै धनगढी उपमहानगरपालिका ३ भन्सारस्थित २ वटा घर र पर्खाल डोजर प्रयोग गरेर भत्काइएको छ । सडक क्षेत्रभित्र रहेका निजी संरचना भत्काउन धनगढी उपमहानगरपालिकाका प्रमुख नृपबहादुर वड, वडा नं ३ का वडा अध्यक्ष बलबहादुर ऐर लगायत वडाका जनप्रतिनिधीहरुको उपस्थितिमा भत्काइएको हो ।

सडक क्षेत्र कब्जा गरेर बनाएका निजी संरचना हटाउन पटक–पटक अनुरोध गर्दा पनि अटेरी गरेका कारण आफुहरुले कठोर निर्णय लिनु परेको नगरप्रमुख वडले बताए । उपमहानगरपालिकाको अनुरोधलाई कमजोरीको रुपमा लिएर सडक क्षेत्रभित्र रहेका संरचना नहटाउनेका बिरुद्ध कडा रुपले प्रस्तुत हुने पनि नगरप्रमुख वडले चेतावनी दिए ।

धनगढी उपमहानगरपालिका वडा नं ३ का अध्यक्ष बलबहादुर ऐरले भन्सारस्ीित चक्रपथ निर्माणमा अवरोध गर्ने स्थानीय गोकर्ण पौडेलको घर र पर्खाल डोजरको प्रयोग गरेर भत्काएको बताए । त्यस्तै त्रिनगर भन्सार कार्यालयको चेकजाँच भवनको आधाभाग त्यहाँका प्रमुखको स्वीकृतीमा भत्काइएको वडा अध्यक्ष ऐरले जनाए ।

सडक क्षेत्रमा घर र पर्खाल लगाएर निर्माण कार्यमा अवरोध गर्ने गोकर्ण पौडलको घरमा डोजर लगाउनु उपमहानगरपालिकाको बाध्यता रहेको वडा अध्यक्ष ऐरको भनाई छ । यस अघि निर्माणाधिन धनगढी अत्तरिया ६ लेन सडक क्षेत्रभित्र रहेका संरचना हटाउन अटेरी गर्नेका घर पर्खालहरु नगरप्रमुख वडले आफै डोजरमा चढेर भत्काएका थिए ।