सुर्खेत – राष्ट्रिय सभाका अध्यक्ष गणेशप्रसाद तिमिल्सेनाले कर्णालीको च्याउ, झ्याउ र स्याउले कर्णालीको मात्रै नभई देशकै मुहार फेर्न सक्ने बताएका छन् ।

कर्णाली प्रदेश सभाको चौथो अधिवेशनको २३ औं बैठकलाई सम्बोधन गर्दै अध्यक्ष तिमिल्सेनाले कर्णाली स्थानीय उत्पादनको प्रयोग गरेर समृद्ध बन्ने बताए ।

‘यहाँहरूसँग पर्याप्त सम्भावनाहरू छन्,’ उनले भने, ‘ती सम्भावनालाई कसरी वास्तविकतातिर रुपान्तरण गर्न सकिन्छ प्रदेश सरकारले योजना बनाई कार्यान्वयन गरोस् ।’ 

अध्यक्ष तिमिल्सेनाले सूर्य पनि अस्ताउन पश्चिम आइपुग्ने आहान फेरिँदै गएको बताए । ‘कर्णाली प्रदेशमा निर्मित विश्वविद्यालय, अस्पताल, सञ्चार र सडकको ‘कनेक्टिभिटी’लाई लोकतन्त्रको उपहारको रुपमा लिनुपर्ने हुन्छ,’ उनले भने, ‘मध्यपश्चिमाञ्चल विश्वविद्यालय, सुर्खेत–जुम्ला करिडोर, भेरी करिडोर, टेलिफोन र इन्टरनेट सञ्जालको विस्तार र गाउँ बस्तीमा खुलेका अस्पताल यसैका उदाहरण हुन् ।’

कर्णालीमा पर्याप्त मात्रामा बिजुली उत्पादन गर्न सक्ने अवस्था रहेको उनले बताए । ‘भेरी, कर्णाली र तिला नदीबाट मात्रै विद्युत् उत्पादन गर्न सके कर्णालीको स्वरुप परिवर्तन हुन समय लाग्दैन,’ उनले भने, ‘पर्यटन र सेवा क्षेत्रले विद्युतीय माग बढ्ने भएकाले उत्पादित विद्युत् कहाँ बेच्ने भन्ने चिन्ता लिनुपर्ने अवस्था समेत छैन ।’

स्थानीय जडीबुटी कौडीको भाउमा निर्यात गर्नुको साटो कर्णालीको विकासका लागि जडीबुटी प्रशोधन उद्योग खोल्न सरकारलाई सुझाव दिए । सिँचाइ, खानेपानी, माछापालन र पर्यटनलाई जरुरी परियोजनाको अभिन्न अंगको रुपमा लिएको खण्डमा विकासको प्रतिफल सोझै जनताको हातमा पर्ने उनको तर्क छ ।

सुर्खेत–जुम्ला सडक स्तरोन्नति गर्ने, कोहलपुर–सुर्खेत ४ लेन सडक बनाउने, सुर्खेत–सिमिकोट–हिल्सा सडक योजना बनाएको खण्डमा धेरैले वाह कर्णाली भन्ने दिन चाँडै आउने उनले बताए । उनले विकास निर्माणमा जनताको प्रत्यक्ष सहभागिता जुटाएको खण्डमा कर्णालीको विकास सम्भव रहेको बताए ।

प्रदेशसभा बैठकमा सभामुख राजबहादुर शाहीले मुख्यमन्त्री कार्यालयबाट भौतिक पूर्वाधार विकास मन्त्री खड्कबहादुर खत्रीलाई पदमुक्त गरी मुख्यमन्त्रीले नै मन्त्रालय सम्हालेको प्राप्त पत्र पढेर प्रदेश सभालाई जानकारी गराएका थिए ।