राँझा – नेपालगञ्ज उपमहानगरपालिका क्षेत्रमा मापदण्डविपरीत सडक अतिक्रमण बढेको छ ।

चारलेन सडकको बीपी–गणेशमानचोकदेखि राझाँसम्म तथा भित्री सडक सदरलाइनमा व्यापारीले फूटपाथमा सामान राखेर अतिक्रमण गर्दै आएका छन् । 

सडकको किनारमा रहेको फूटपाथ पैदलयात्रीका लागि आवतजावत गर्ने ठाउँ भएपनि त्यो क्षेत्रलाई अहिले अधिकांश स्थानमा व्यावसायिक प्रयोजनका लागि प्रयोग गर्ने गरिएको पाइएको छ ।

नेपालगञ्ज उद्योग वाणिज्य संघले समेत अतिक्रमणकारीलाई साथ दिएको स्थानीयको गुनासो छ । अतिक्रमण हटाउने अभियानमा उपमहानगरपालिकाले सहयोग र समन्वयका लागि अनुरोध गरेको जानकारी दिँदै संघका अध्यक्ष नन्दलाल वैश्यले फूटपाथ तथा सडक अतिक्रमणमा आफूले सहयोग गर्ने उल्लेख गरे ।

उपमहानगरपालिकाका प्रमुख प्रशासकीय अधिकृत हरि प्याकुरेलले सडक तथा फूटपाथ अतिक्रमण गरी व्यापार व्यवसाय गर्दै आएकालाई सूचना जारी गरिसकिएकाले अब सडक तथा फुटपाथमा राखिएका ठेला तथा पसलहरू जफत गरिने बताए ।

‘हामीले धेरै पटकसम्म सडक अतिक्रमण गरी पसल तथा ठेला नलगाउन अनुरोध गर्दै आउँदासमेत अटेरी गरेको हुँदा अब जफत भएका कुनै पनि सामान फिर्ता हुने छैन,’ उनले भने, ‘अतिक्रमणले फूटपाथमा हिँड्ने पैदल यात्रीलाई असुविधा भएकाले यस्तो अभियान चाल्न बाध्य भएका हौं ।’ गत वर्ष उपमहानगरपालिकाले ट्राफिक प्रहरीसँग सहकार्य गरेर फूटपाथ हटाउने प्रयास गरेको थियो । 

फूटपाथ अतिक्रमण गरेर व्यापार गर्दै आएका बीपीचोक र पुष्पलालचोक क्षेत्रका व्यापारीले उपमहानगरपालिकाको उक्त कदमको विरोध गरेपछि व्यापारीको विरोधपश्चात उपमहानगरपालिका हच्किएको थियो । फूटपाथ खाली गर्न सर्वपक्षीय र सर्वदलीय बैठकले नै सहमति दिएको थियो ।

चारलेन सडकको दायाँबायाँ २५ मिटरभित्र अहिले पुनः अस्थायी संरचना राखिएका कारण सडक दुर्घटना समेत बढेको ट्राफिक प्रहरीका नायब निरीक्षक भीमराज वलीले बताए ।