​कारागार कार्यालय चितवनमा कैदी-बन्दीको चाप बढेसँगै उनीहरूको व्यवस्थापनमा चुनौती थपिएको छ । क्षमताभन्दा बढी कैदीबन्दी हुँदा व्यवस्थापनमा कठिन भएको छ ।

कारागारमा २ सय ५५ पुरुष र २५ जना महिला कैदी-बन्दी व्यवस्थापनको क्षमता भए पनि हाल ४२ जना महिला र ७ सय ४२ पुरुष र चार जना आश्रित बालबालिका छन् । सङ्ख्या बढ्दै जाँदा कैदी-बन्दीलाई त्रिपालमुनि राख्न शुरू गरिएको कार्यालयका प्रमुख कमलप्रसाद आचार्यले बताए । 

उनका अनुसार विगत १५ दिनदेखि कैदी-बन्दीलाई त्रिपालमुनि राख्न शुरू गरिएको हो । उनले भने, 'अहिले कैदी-बन्दीको चाप बढेसँगै १० जनालाई त्रिपालमुनि राखेका छौं ।'

मौसममा आएको परिवर्तनसँगै कैदी-बन्दीलाई व्यवस्थापनमा असहज हुने गरेको उनले बताए ।

त्रिपालमुनि कैदीबन्दी राख्दा सुरक्षा व्यवस्थामा उच्च सावधानी अपनाइएको उनले जानकारी दिए । गर्मी मौसम शुरू भएसँगै जाडोमा व्यवस्थापन गरे जसरी व्यवस्थापन गर्न असहज हुने गरेको उनले बताए ।

उनले भने, 'छिमेकी जिल्ला नवलपुर (बर्दघाट–सुस्तापूर्व) कारागार कार्यालय नहुँदा पनि यहाँ कैदीबन्दीको चाप बढेको हो ।'

छिमेकी जिल्लाबाट आएका कैदीबन्दी र जिल्लाबाटै आउने कैदी-बन्दीको सङ्ख्या बढ्दो क्रममा रहेको उनले बताए । कारागारमा आएका कैदी-बन्दीको व्यवस्थापनका लागि कारागार व्यवस्थापन विभागसँग छलफल भइरहेको उनले जानकारी दिए ।