म्यानचेस्टर सिटी इङ्लिस प्रिमियर लिगको दोस्रो स्थानमा उक्लिएको छ । बिहीबार राति सम्पन्न खेलमा सिटीले ब्राइटनलाई ४-० गोल अन्तरले पराजित गर्दै सिटी लिभरपुललाई उछिन्दै दोस्रो स्थानमा उक्लिएको हो ।

शीर्ष स्थानमा रहेको आर्सनलसँग सिटी १ अंकले मात्रै पछि छ । ३४ खेल खेलेको आर्सनलको ७७ अंक छ। एक खेल कम खेलेको सिटीको ७६ र तेस्रो स्थानमा रहेको लिभरपुलको ७४ अंक रहेको छ ।

खेलको १७औँ मिनेटमा केभिन डी ब्रुएनाको गोलमार्फत् सिटीले शुरूआती अग्रता लिएको थियो । २६औँ मिनेटमा फोडेनले अग्रता दोब्बर बनाए । ३४औँ मिनेटमा बर्नार्डो सिल्भाको पासमा फोडेनले अग्रता ३-० मा पुर्‍याए । ६२औँ मिनेटमा वाकरको पासमा जुलियन अल्भारेजले गोल गर्दा सिटी ४-० ले विजयी भयो।