एनआरएनएसम्बन्धी दुई मुद्दा सर्वाेच्चमा

गैरआवासीय नेपाली संघ (एनआरएनए) को विवादबारे फैसलापछि पनि थप दुई नयाँ मुद्दा दर्ता भएका छन् । सर्वोच्च अदालतले चैत २१ मा संघलाई २०७८ माघ १ को अवस्थामा फर्काउँदै सोही बिन्दुबाट सहमतिको खोजी गर्न फैसला गरेपछि पनि मुद्दा मामिला जारी रहेको हो । 

सर्वोच्च अदालतमा एउटा अभियन्ता बद्री केसी र हेमराज शर्माविरुद्धको मुद्दा छ । यस्तै बद्री केसी पक्षधरले पनि एउटा मुद्दा दायर गरेको छ । यसबाहेक विभिन्न अदालतमा केही थान पुरानो मुद्दा पनि बाँकी नै रहेको बताइएको छ । 

गत वैशाख २३ गते गैरआवासीय नेपाली संघको ११ औ महाधिवेशनबाट निर्वाचित अन्तर्राष्ट्रिय समन्वय परिषद्को तर्फबाट भन्दै कृष्णप्रसाद तिमल्सेना समेत ४ जनाले परराष्ट्र मन्त्रालयलाई विपक्षी बनाएर मुद्दा दायर गरेका थिए । 
केसी पक्षको योजनामा दायर उक्त मुद्दामा परराष्ट्र मन्त्रालयले सर्वोच्चको पछिल्लो फैसलालाई देखाएर दैनिक प्रशासनीय कामकारबाही समेत गर्न नपाउने गरी हतारमा पत्राचार गरेकाले यसलाई सच्याउँदै कामकाज गर्न दिन माग गरिएको छ ।

सो मुद्दामा वैशाख २४ गते न्यायाधीश महेन्द्र पौडेल शर्माको इजलासमा सुनुवाइ भएर कारण देखाऊ आदेश हुँदै दुवै पक्षलाई अन्तरिम आदेशका लागि छलफलमा बोलाइए पनि त्यसपछि दुई पटक पेशी तोकेर पनि हेर्न नभ्याइनेमा परेको छ । 

यस्तै अधिवक्ता श्यामकृष्ण मास्केले दायर गरेको केसी र शर्माविरुद्धको अवहेलना मुद्दामा जेठ ६ गते सुनुवाइ पछि सर्वोच्चले आदेश जारी गरेको छ । प्रधानन्यायाधीश विश्वम्भरप्रसाद श्रेष्ठ र न्यायाधीश सारंगा सुवेदीको संयुक्त इजलासले अर्को मुद्दालाई समेत सँगै राखी अर्को पेशीमा सुनुवाइका लागि आदेश जारी गरेको हो। 

आदेशअनुसार अब अवहेलनासम्बन्धी र तिमल्सेनासहितको मुद्दासहित पुरानो यस्तै प्रकृतिका केही मुद्दा भएमा सो समेत सँगै राखेर सुनुवाइ हुनेछ । तर, अदालतले सुनुवाइका लागि अर्को पेशी तोकिनसकेको सर्वोच्चले जनाएको छ ।