जनकपुरधाम, ५ माघ- स्वतन्त्र मधेश गठबन्धनका संयोजक डा. सीके राउत भनिने चन्द्रकान्त राउतलाई गिरफ्तार गर्न धनुषा प्रहरीले शुक्रबार बिहानैदेखि घेराबन्दी गरेको छ ।

प्रहरी निरीक्षक रामकिशोर साहको कमाण्डमा खटिएका करिब दुई दर्जन प्रहरीले जनकपुर उपमहानगरपालिका- ४ परिक्रमा सडकखण्डको माछा बजारस्थित सीके राउत बहालमा बस्दै आएको घरलाई घेराबन्दी गरेका हुन् ।

जिल्ला प्रहरी कार्यालय धनुषाका प्रहरी उपरीक्षक (एसपी) चक्रबहादुर सिंह आफैं पनि राउत बस्दै आएको घरसम्म पुगी वस्तुस्थिति बुझेर फर्किएका छन् ।

आज माघ ५ गते बलिदानी दिवसको अवसरमा राउतले आमसभा आयोजन गर्न सक्ने तथा विखण्डनवादी गतिविधि बढाउन सक्ने आशंकामा प्रहरीले राउतलाई पक्राउ गर्न खोजेको हो । राउतलाई आज घरबाट निस्किन र कुन विखण्डनकारी गतिविधि गर्न नदिने र आवश्वक परे पक्राउ गर्ने प्रहरीको तयारी छ ।

उपेन्द्र यादव नेतृत्वको तत्कालीन जनअधिकार फोरमले गरेको आन्दोलनका क्रममा ०६३ साल माघ ५ गते सिराहाको लहानमा रमेश महतो शहीद भएको दिनको सम्झनामा मधेशकेन्द्रित दलहरुले बलिदानी दिवस मनाउने गरेका छन् ।

राउत नेतृत्वको गठबन्धनले गत वर्ष आजकै दिन सिरहाको एक विद्यालय प्राङ्गणमा आमसभा गरेको थियो । त्यसैक्रममा दिएको अभिव्यक्तिलाई लिएर सिरहा प्रहरीले पक्राउ गरी राउतविरुद्ध राज्य विप्लवको मुद्दा चलाएको थियो ।

राउतलाई यसअघि गत मांसिर १० मा पनि पक्राउ गरिएको थियो । निर्वाचनविरोधी गतिविधि गरेको आरोपमा पक्राउ परेका राउत पछि जिल्ला अदालत धनुषाबाट साधारण तारेखमा रिहा भएका थिए। त्यतिबेला उनले प्रतिनिधिसभा तथा प्रदेशसभा सदस्य निर्वाचन बहिष्कार गर्न भन्दै सामाजिक सञ्जालमा एक भिडियो अपलोड गरेका थिए ।

२०७२ माघ २० देखि राउत जनकपुरमा डेरा गरी बस्दै आएका छन् । आज प्रहरीले घेराउ गरेको घरमा राउत २०७३ पुसबाट बस्दै आएका हुन् । त्यसअघि बस्दै आएको घरमा प्रहरीले घरबेटीलाई समेत पटक-पटक सोधपुछ गर्ने गरेपछि राउत डेरा सरेका थिए । शुरुमा राउत सप्तरीबाट जनकपुर सर्दा उनलाई डेरा दिन कसैले पनि मानेका थिएनन् ।