काठमाडौं – बजेटको मुख्य स्रोतको रूपमा रहेको राजस्व संकलनमा लक्ष्य भेट्टाउन सरकारलाई चुनौती रहेको देखिएको छ ।

चालू आर्थिक वर्षमा कुल बजेटको ६३ प्रतिशत रकम राजस्व संकलनबाट जोहो गर्ने सरकारी लक्ष्य रहेको थियो तर आर्थिक वर्ष सकिनैलाग्दा समेत लक्ष्यभन्दा न्यून राजस्व संकलन हुने देखिएको छ ।

चालू आर्थिक वर्षमा सरकारले ८ खर्ब ३१ अर्ब ३१ करोड ८० लाख रुपैयाँ राजस्व संकलन गर्ने संशोधित लक्ष्य राखेको थियो तर आइतवारसम्म सरकारले ६ खर्ब ६१ अर्ब ४० करोड २१ लाख रुपैयाँ राजस्व संकलन गरेको महालेखा नियन्त्रकको कार्यालयले जनाएको छ ।

संकलन गरिएको राजश्व सरकारले राखेको संशोधित लक्ष्यको ७९ दशलमव ५६ प्रतिशत हो । तथ्यांकमा करीब ८० प्रतिशत राजस्व संकलन गरेको देखिएपनि अझै २० प्रतिशत राजस्व संकलन गर्न सरकारलाई चुनौती देखिएको छ । आर्थिक वर्ष समाप्त हुन करीब १ हप्ता मात्रै बाँकी हुँदा अझै १ खर्ब ६९ अर्ब ९१ करोड ५९ लाख रुपैयाँ राजस्व संकलन गर्ने दबाब सरकारमाथि छ ।

आइतवारसम्मको तथ्यांक अनुसार करमार्फत सरकारले ५ खर्ब ८८ अर्ब ७२ करोड ६१ लाख रुपैयाँ र गैरकरमार्फत ७२ अर्ब ६७ करोड ६० लाख रुपैयाँ राजस्व संकलन गरिएको छ ।

सरकारले संशोधित लक्ष्य अनुसार राजस्व संकलन गर्ने गरी राजस्व संकलनका लागि कर्मचारी खटाइएको जनाएको छ ।

नेपाल राष्ट्र बैंकका पूर्व गभर्नर दीपेन्द्रबहादुर क्षेत्रीले सरकारले लक्ष्य अनुसार राजस्व संकलन गर्न नसकेपनि लक्ष्यको नजिक पुग्न सक्ने बताए । ‘बढी नाफा कमाउने संस्थालाई चालू आर्थिक वर्षमै कर तिर्न लगाउनुपर्छ,’ उनले भने, ‘जस्तै टेलिकम्युनिकेसन र बीमा कम्पनीहरूले आव सकिएपछि राजस्व तिर्ने गरेकोमा उनीहरूलाई चालू आर्थिक वर्षमा नै तिर्न लगाउनुपर्छ । यसो गर्दा लक्ष्यको नजिक चाहिँ पुग्न सकिन्छ ।’

राजस्वबाहेक सरकारले चालू आर्थिक वर्षको बजेटका स्रोतहरू विदेशी अनुदान, वैदेशिक ऋण पनि रहेका थिए ।