काठमाडौं – ब्राजिली फूटबल खेलाडी नेयमारविरुद्ध लागेको बलात्कारको आरोपसम्बन्धी मुद्दालाई प्रहरीले स्थगित गरेको बताएको छ ।

साओ पाउलोस्थित महान्यायाधिवक्ताको कार्यालयले प्रमाणको अभाव भएका कारण मुद्दा स्थगन गरिएको तर अभियोजनकर्ताहरूलाई अन्तिम निर्णयका लागि पठाइने बताएको छ । 

ब्राजिली मोडल नाजिला ट्रिनडाडेले मे महिनामा फ्रान्सको पेरिसमा आफूलाई नेयमारले आक्रमण गरेको आरोप लगाएकी थिइन् । 

नेयमारले यी आरोपको खण्डन गर्दै आफूसँग पैसा धुत्न यो आरोप लगाइएको बताए । 

नेयमारका प्रवक्ताले प्रहरीको निर्णयका विषयमा टिप्पणी गर्न असमर्थ रहेको बताए । 

यो मुद्दाले पूरै ब्राजिलको ध्यानाकर्षण गरेको छ । 

यो मुद्दाका बारेमा जानकारी जुन महिनामा सार्वजनिक भएको थियो । त्यतिखेर पेरिस सेन्ट–जर्मान स्टार नेयमारले इन्स्टाग्राममा एउटा भिडियो पोस्ट गरेर आफूविरुद्ध बलात्कारको आरोप लागेको बताएका थिए । उनले ह्वाट्सयापमा प्राप्त सन्देश र महिलाको तस्वीर समेत प्रकाशित गरेका थिए । 

ट्रिनडाडेले त्यसपछि सार्वजनिक भएर टेलिभिजनलाई अन्तर्वार्ता दिइन् अनि आफूहरूबीच भएको विवादको फूटेज र भिडियो क्लिप सार्वजनिक गरिन् । 

प्रहरीले पछि ट्रिनिडाडेविरुद्ध मानहानिको मुद्दा हाल्यो । प्रहरी भ्रष्ट भएको भन्दै ट्रिनिडाडेले संकेत गरेपछि यो मुद्दा हालिएको थियो । 

मोडलको मुद्दा अनेकौं वकिलले लिन मानेका थिएनन् । 

न्यायाधीशले अन्तिम आदेश दिनुअघि अभियोजनकर्ताहरूले अब १५ दिनभित्र मुद्दाको अध्ययन गर्नुपर्नेछ ।

बीबीसीबाट