बार्सिलोना फूटबल क्लबले एक सामाजिक सञ्जाल कम्पनीलाई लियोनेल मेस्सी लगायतका वरिष्ठ खेलाडीको छवि बिगार्ने गरी सन्देश प्रवाह गर्न पैसा तिरेको सनसनीखेज खुलासा भएपछि क्लबमा संकटको स्थिति आएको छ । 

क्लबका हाकिमहरूले आई३ भेन्चर्स नामक सामाजिक सञ्जाल कम्पनीलाई नियुक्त गरेर अध्यक्ष जोसेप मारिया बार्टोमेउ र उनको बोर्डको छवि उजिल्याउन अनि मेस्सी र भेटेरान डिफेन्डर जेरार्ड पिकेको छवि धमिल्याउने कोशिश गरिएको कुरा स्पेनका स्थानीय मिडियाहरूमा छापिएपछि क्लबले सोमवार त्यसको खण्डन गरेको थियो । 

क्लबले यस्तो दाबी गर्नेविरुद्ध कानूनी कारवाहीमा जाने धम्की पनि दिएको छ र छापिएको खबरलाई तत्कालै सच्याउन पनि भनेको छ । 

क्लबले आरोपको कडा खण्डन गरेको भए पनि केही दिनअघि मेस्सी र स्पोर्टिङ डाइरेक्टर एरिक आबिदालबीच भएको विवादपछि अर्को सार्वजनिक विवादको सामना गर्नुपरेको छ । 

अघिल्ला व्यवस्थापक अर्नेस्टो भाल्भेर्देलाई खेलाडीहरूले भरपूर सहयोग नगरेको भनी आबिदालले बयान दिएपछि मेस्सीले त्यसको सार्वजनिक खण्डन गरेका थिए । 

क्लबका अधिकारीहरूले क्लबलाई एकताबद्ध राख्न आबिदाललाई पदमा रहिरहन भने पनि यो सार्वजनिक विवादले क्लबलाई बेइज्जत चाहिँ गरायो । नयाँ व्यवस्थापक किके सेतिएनले बार्सिलोनाको विगतको गौरवशाली खेलशैली फर्काउन खोजिरहेका छन् । ला लिगा अनि च्याम्पियन्स लीग दुवैमा बार्साको चुनौती कायमै राख्ने चुनौती उनैलाई छ । 

बार्साले जनवरी महिनाको ट्रान्सफर विन्डोमा कुनै पनि खेलाडी ल्याउन सकेन तर सोमवार उनीहरूलाई एउटा स्ट्राइकर साइन गर्नका लागि अनुमति दिइएको छ । 

च्याम्पियन्स लीगमा अर्को हप्ता बार्साले नेपोलीसँग कठिन म्याच खेल्नुपर्नेछ । 

क्लबमा ताजा विवाद आएपछि सेतिएनको व्यवस्थापनमा गौरवशाली विगतलाई पुनर्जागृत गर्न लागिएको कुरामा असर पर्ने देखिन्छ चाहे क्लबले जति नै खण्डन गरिरहोस् ।

अहिलेको विवादले त क्लब र यसका कप्तान मेस्सी कुन दिशामा जाने हुन् भन्ने विषयमा थप अनुमानको बजार तताएको छ । मेस्सीलाई प्रत्येक सीजनको अन्त्यमा क्लब छोडेर जाने विकल्प रहेको खुलासा भएपछि यो अनुमान झनै गर्माएको हो । अनि युरोपका ठूला क्लबले उनलाई भित्र्याउन कुनै हिचकिचाहट देखाउने छैनन् । 

मेस्सीले १२ वर्षको उमेरदेखि क्लबप्रति बफादारिताको दाबी गरिरहेका छन् तर ताजा विवादमा उनको नाम जोडिएपछि अरू क्लबहरूले उनलाई ल्याउन सकिन्छ भनी आशा गरेका छन् । 

शायद त्यही डरले गर्दा पनि होला सोमवार बार्सिलोनाले विवादास्पद दाबीलाई तत्कालै र कडा शब्दमा खण्डन गरेको हुनसक्छ ।