जनकपुरधाममा ‘लक–डाउन’ : पहिलो दिन खुकुलो ! [फोटोफिचर]

कोरोना भाइरस संक्रमणको प्रभावलाई नियन्त्रण गर्न जिल्ला प्रशासन कार्यालय धनुषाले मंगलवारदेखि जिल्लाको सीमा क्षेत्रमा बिहान ६ बजेदेखि १८ गतेसम्मका लागि ‘लक–डाउन’ घोषणा गरेका छन् ।

धनुषाका प्रमुख जिल्ला अधिकारी (प्रजीअ) कोशहरि निरौलाले मंगलवार एक प्रेस विज्ञप्ति जारी गर्दै संक्रामक रोग ऐन २०२० को दफा २ तथा स्थानीय प्रशासन ऐन २०२८ को दफा (३) बमोजिम निषेधाज्ञा जारी गरेका हुन् ।

नेपाल सरकारले चैत्र १० गते गरेको निर्णयानुसार कोरोनाको प्रभाव तथा जोखिम न्यूनीकरण गर्न आदेश जारी गरिएको प्रजिअ निरौलाले बताए ।

जिल्ला सुरक्षा समितिको बैठक बसेर निषेधाज्ञाको निर्णय गरिएको भन्दै उनले भने, ‘आदेशको कार्यान्वयन गर्नका लागि कूल २ हजार संख्यामा सुरक्षाकर्मी परिचालन गरिएको छ ।’ ६०० नेपाली सेना, ७०० नेपाल प्रहरी र ७०० सशस्त्र प्रहरी समेत परिचालन गरिएको उनले लोकान्तरलाई जानकारी दिए ।

‘लक–डाउन’ गरिएको पहिलो दिन मंगलवार २ नम्बर प्रदेशको अस्थायी राजधानी जनकपुरधाममा सम्पूर्ण बजार बन्द भएपनि सडकमा मानिसको आवागमन भने जारी नै छ । लामो तथा छोटो दूरीमा चल्ने सार्वजनिक यातायातका सवारीसाधन पूर्णरुपमा ठप्प भएपनि निजी सवारीसाधनमा आवागमन जारी नै रहेको देखिएको छ ।

जनकपुरको प्रसिद्ध जानकी मन्दिर, राम मन्दिर सुनसान देखिएका छन् । सर्वसाधारण खाना पकाउने एलपी ग्यास सिलिन्डर किन्न बजारमा आएका देखिएका छन् । केही होटेल खुलेका छन् भने शहरका भित्रि गल्लीमा रहेका किराना पसल समेत खुलेका छन् ।

शहरका विभिन्न चोकमा रहेका औषधि पसल खुलेका छन् भने सरकारी तथा निजी अस्पताल समेत खुलेका छन् । कुनै–कुनै ठाउँमा मास्क बेच्नका लागि फूटपाथमा पसल सञ्चालनमा रहेका छन् ।

शहरका विभिन्न चोकमा संयुक्त रुपमा सुरक्षाकर्मी परिचालन गरिएको छ । सडकमा गुड्ने गरेका सवारीसाधनलाई फिर्ता पठाउने काम समेत गरिएको छ । ‘आज पहिलो दिन भएको कारण बिहानतिर अलि खुकुलो देखिएपनि सम्झाइबुझाई तत्काल घर फिर्ता पठाउने गरेका छौं,’ प्रजिअ निरौलाले भने, ‘बेलुकादेखि अत्यन्त कडाइका साथ सुरक्षाकर्मी परिचालन हुनेछन् ।’

अत्यावश्यक कामबाहेक सर्वसाधारण सडकमा देखिएमा पक्राउ गरेर ऐन बमोजिम कारबाही गर्न सुरक्षाकर्मीलाई निर्देशन समेत दिइसकिएको उनले बताए ।

अत्यावश्यक सेवा प्रदान गर्ने निकायका व्यक्तिलाई सवारीसाधन चढ्नका लागि प्रमुख जिल्ला अधिकारीले सवारी पास जारी गरेका छन् ।