कोरोनाभाइरस फैलिन नदिनका लागि बन्दाबन्दी (लकडाउन) र यात्रामा प्रतिबन्ध नै सर्वोत्तम उपाय भएको चीनमा गरिएको एक अध्ययनले देखाएको छ । 

बेलायतको अक्सफोर्ड विश्वविद्यालय र अमेरिकाको बोस्टनमा रहेको नर्थईस्टर्न विश्वविद्यालयका अनुसन्धाताहरूले कोरोना संक्रमणको केन्द्रविन्दुका रूपमा रहेको वुहानमा यात्रा प्रतिबन्ध प्रभावकारी रहेको पाए । 

यात्रा प्रतिबन्ध नलगाउँदा संक्रमण बढेको भए पनि लगाएपछि भने ९२ प्रतिशतले घटेको पाइयो । 

तर वुहान रहेको हुबेई प्रान्त बाहिर यात्रामा नियन्त्रण लगाइँदा अनि स्वास्थ्य परीक्षण र संक्रमित पहिचान गर्दा संक्रमण रोक्न सकिएको थियो । 

अनुसन्धान टोलीले यो उपाय अमेरिकाका लागि महत्त्वपूर्ण रहेको बताएको छ किनकि त्यहाँ केही राज्यले लकडाउन लगाएका छन् भने केहीले छैनन् जबकि त्यहाँ संक्रमणको मात्रा बढेको छ । 

वुहानले जनवरी ३१ सम्म यात्रा प्रतिबन्ध लगाएको थिएन । त्यस मितिभन्दा अघि हुबेई बाहिरका संक्रमितहरूमध्ये ५१५ जना वुहान पुगेको इतिहास थियो । 

तर जनवरी ३१ पछि वुहान पुगेका मानिसको केस जम्मा ३९ वटा देखियो । 

भाइरस पत्ता लागेको चार हप्ताभन्दा बढी बितिसकेपछि मात्र वुहानमा बन्दाबन्दी गरिएको थियो र त्यतिखेरसम्म धेरै ढिलो भइसकेको थियो । त्यतिखेर चिनियाँ नववर्षका लागि करोडौं चिनियाँहरू एक ठाउँबाट अर्को ठाउँमा गएका थिए । 

तर अन्य शहरहरूले तत्कालै कारवाही थाले अनि भाइरस फैलिनबाट चाँडो रोके । 

यस अध्ययनको निष्कर्ष सायन्स जर्नलमा प्रकाशित भएको छ । 

अनुसन्धाताहरूका अनुसार, यात्रामा प्रतिबन्ध लगाउँदा अन्य चिनियाँ प्रान्तहरूमा भाइरस तीव्र गतिमा फैलिन पाएन ।