कोरोना संक्रमितको संख्या २० लाख, अमेरिकामा मृत्यु हुनेको संख्या २६ हजार नाघ्यो

विश्वव्यापी महामारीको रुपमा फैलिएको कोरोना भाइरस (कोभिड १९) कारण विश्वमा संक्रमितको संख्या २० लाख नजिक पुगेको छ ।

बुधवार बिहानसम्मको तथ्यांक अनुसार संक्रमितको संख्या १९ लाख ९८ हजार १११ पुगेको छ । 

मृत्यु हुनेको संख्या १ लाख २६ हजार ६ सय ४ पुगेको छ । मृतकको संख्या मंगलवार १ लाख १९ हजार ६९२ पुगेको थियो । 

नेपाली समय अनुसार बुधवार बिहानसम्म कोरोनाका कारण मृत्यु हुनेको संख्या अमेरिकामा २६ हजार ४७ पुगेको छ । मंगलवार यो संख्या २३ हजार ६४० थियो । अमेरिकामा संक्रमितको संख्या ६ लाख १३ हजार ८८६ पुगेको छ । 

बेलायतमा मृतकको संख्या १२ हजार १०७ पुगेको छ भने संक्रमितको संख्या ९३ हजार ८७३ पुगेको छ । कोरोनाका कारण इटलीमा २१ हजार ६७, स्पेनमा १८ हजार २५५ तथा फ्रान्समा १५ हजार ७२९ जनाको मृत्यु भइसकेको छ ।

सन् २०१९ को डिसेम्बरमा चीनको वुहान शहरवाट कोरोनाको संक्रमण शुरू भएको थियो । कोरोना नियन्त्रणमा आएको चीनमा मंगलवार ४६ नयाँ संक्रमण देखा परेका छन् भने १ जनाको मृत्यु भएको छ ।

चीनमा संक्रमितको संख्या ८२ हजार २९५ पुगेको छ । चीनमा कोरोनाका कारण मृत्यु हुनेको संख्या ३ हजार ३ सय ४२ छ ।

कोरोनाको विश्वव्यापी अपडेट गरिरहेको वल्डमिटरका अनुसार नेपालको दक्षिणी छिमेकी भारतमा बुधवार बिहानसम्म संक्रमतिको संख्या ११ हजार ४ सय ८७ पुगेको छ । बुधवारसम्म भारतमा ३९३ जनाको मृत्यु भएको छ । 

नेपालमा अहिलेसम्म १६ जनामा संक्रमण देखिएको छ । विश्वमा संक्रमित मध्ये ४ लाख ७८ हजार ६५९ निको भएका छन् ।