बैतडीमा कोरोना परीक्षण प्रयोगशाला स्थापना हुने

जिल्ला अस्पताल बैतडीमा कोरोना परीक्षण गर्न  प्रयोगशाला स्थापना हुने भएको छ ।

यसका लागि विज्ञको टोलीले सम्भाव्यता अध्ययन समेत गरेको छ ।

सुदूरपश्चिम प्रदेश सरकारले जिल्ला अस्पतालमा पनि सो परीक्षणका लागि पीसीआर ल्याब स्थापना गर्ने निर्णय गरेको थियो ।  

राष्ट्रिय जनस्वास्थ्य प्रयोगशाला काठमाडौका भाइरोलोजिस्ट डा. श्रवणकुमार मिश्र नेतृत्वको टोलीले अस्पतालमा प्रयोगशाला स्थापनाका लागि सम्भाव्यता अध्ययन गरेको जिल्ला अस्पतालका प्रमुख डा. वसन्तराज जोशीले जानकारी दिए ।

टोलीमा डा. मिश्रसँगै डडेल्धुरा अस्पतालका प्रयोगशाला प्रमुख ईश्वरीप्रसाद भुसाल सहभागी थिए ।  जिल्ला अस्पतालमा पीसीआर प्रयोगशाला स्थापना गर्ने कुराले आफूहरूलाई उत्साहित बनाएको डा. जोशीको भनाइ छ । 

प्रयोगशाला सञ्चालनमा आएमा कोरोनाको मात्रै नभएर अन्य मलिकुलर जाँचका लागि समेत सजिलो हुने डडेल्धुरा अस्पतालका प्रयोगशाला प्रमुख भुसालले जानकारी दिए । जिल्ला अस्पतालको ५० शय्याको भवन निर्माण कार्यसमेत जारी रहेकाले प्रयोगशाला स्थापना हुने कुराले भविष्यमा जिल्ला अस्पतालले प्रदान गर्ने सेवालाई प्रभावकारी बनाउन सहयोग पुग्ने विश्वास गरिएको छ  ।