धौलागिरि अञ्चल अस्पतालमा आईसीयू सेवा, पोखरा आउनुपर्ने बाध्यताको अन्त्य

धौलागिरि अञ्चल अस्पताल बागलुङमा सघन उपचार कक्षका लागि मशिन जडान कार्य भइरहेको छ ।

कोरोना भाइरस संक्रमणका कारण उत्पन्न परिस्थितिबीच अस्पतालमा ३ शय्या क्षमताको सघन उपचार कक्ष स्थापनाका लागि ९० लाख रूपैयाँ बराबरको सामान आइपुगेको र मुख्य सामान जडान  भइसकेको अस्पतालका मेडिकल सुपरिन्टेन्डेन्ट डा. शैलेन्द्र बि पोखरेलले लोकान्तरलाई जानकारी दिए ।

‘बोलपत्र आह्वान गरी सामान ल्याई मेजर सामान जडान गरिसकिएको र अब छिट्टै आईसीयू सेवा उपलब्ध हुनेछ,’ उनले भने ।

संघीय सरकारले १ करोड र गण्डकी प्रदेश सरकारले ५० लाख रुपैयाँ अस्पतालको व्यवस्थापनका लागि प्रदान गरेका थिए । त्यसमध्ये पोखरा र काठमाडौंका गरी २ कम्पनीले आईसीयूको लागि टेन्डर पारेका हुन् । कोरोनाकै बीचमा अस्पतालले अघिल्लो महिना टेन्डर खुलाएको थियो ।

अस्पतालमा यसअघि आईसीयू अभावमा बिरामीहरू पोखरा तथा काठमाडौंका अस्पतालमा उपचारार्थ जानुपर्ने बाध्यता थियो । सोको अब अन्त्य हुने भएको छ ।

अस्पताल व्यवस्थापन समिति अध्यक्ष केबि रानामगरले आफ्नो टीम आइसकेपछि आईसीयू माग गर्दै आएको बताए । अब आईसीयू सञ्चालनका लागि दक्ष जनशक्ति आवश्यक पर्ने हुँदा ३ जनालाई पोखरामा तालिमका लागि पठाइएको र अन्यको लागि प्रदेश सरकारलाई जानकारी दिइएको उनले बताए ।

अस्पतालमा कोरोना संक्रमितका २ जना बिरामी जाँदा समेत भेन्टिलेटर नभएकोमा हाल ३ भेन्टिलेटर स्थापना गरिएको छ । जसमा संघले २ र प्रदेश सरकारले १ वटा भेन्टिलेटर उपलब्ध गराएका हुन् ।

आजभन्दा ५१ वर्षअघि विक्रम संवत् २०१६ सालमा सामान्य अस्पतालको रूपमा स्थापित सो अस्पताल २०६६ सालमा आएर अञ्चल अस्पतालको रुपमा विकसित भएको हो । अस्पतालमा विशेषगरी बागलुङ, पर्वत, म्याग्दी र मुस्ताङ जिल्लाका बिरामी बढी आउँछन् ।