रुपन्देहीको तिलोत्तमास्थित क्रिमसन अस्पतालमा उपचारत कोरोना संक्रमित पुरुषको बिहीवार बिहान मृत्यु भएको छ ।

यससँगै नेपालमा कोरोना भाइरस संक्रमणबाट मृत्यु हुनेको संख्या ३ पुगेको छ ।

गुल्मी जिल्लाको मदाने गाउँपालिका–६ पुरकोटदह घर भई देउराली आधारभूत विद्यालयका प्रधानाध्यापक (हेडसर) रहेका उनी जेठ १ गते अस्पतालमा भर्ना भएका थिए । 

प्रादेशिक स्वास्थ्य निर्देशनालयका फोकल पर्सन डा. उमाशंकरप्रसाद चौधरीले बिहीवार बिहान ७ः१० बजे उनको मृत्यु भएको लोकान्तरलाई जानकारी दिए । उनलाई भेन्टिलेटरमा राखिएको थियो ।

बुधवार नै उनको मृत्यु भएको केही मिडियामा समाचार आएपछि अस्पतालले खण्डन गरेको थियो । उनको शव व्यवस्थाका लागि प्रदेश सरकार र सुरक्षा निकाय जुटेको छ ।

शिक्षण पेशामा रहेका उनी बिरामी भएपछि अर्घाखाँचीको एक मेडिकलमा चेकजाँचपछि रुपन्देहीको क्रिमसन अस्पतालमा उपचारत थिए । 

उनको स्वास्थ्य अवस्था नाजुक भएका कारण उनलाई मंगलवार बुटवलको कोरोना विशेष अस्पताल सार्न सकिएको थिएन । कोरोना पुष्टि भएपछि बिरामी सार्ने प्रक्रियामा जोखिम हुनसक्ने भन्दै प्रदेश सरकारका अधिकारीले क्रिमसन अस्पताल प्रशासनलाई अनुरोध गरेपछि उनको त्यहीँ नै उपचार भएको थियो । यसअघि ५ नम्बर प्रदेशमा बाँकेको नरैनापुरको क्वारेन्टाइमा रहेका १ युवाको पनि मृत्यु भएको थियो । 

मदाने गाउँपालिकाका अध्यक्ष दानबहादुर केसीले उनलाई कसरी कोरोना संक्रमण भयो भनेर सबै अचम्ममा परेको बताए । ‘उहाँ कहीँ पनि जानुभएको छैन । कसरी संक्रमण भयो अचम्म भयो,’ अध्यक्ष केसीले भने । रिपोर्ट साटिएको हुनसक्ने भन्दै आफूले पुनः जाँच गर्न अनुरोध गरेको बताए । उनको पुनः स्वाब संकलन गरी जाँचको लागि पठाइएको छ ।

हाल मदाने गाउँपालिका शिल गरिएको छ । गाउँका ३० जनाको स्वाब संकलन गरी पीसीआर जाँचका लागि प्रदेश जनस्वास्थ्य प्रयोगशाला भैरहवा पठाइएको केसीले बताए । ‘पुरकोटदहको क्लिनिकमा जाँच गराउँदा जन्डिस र मृगौलाको समस्या देखिएको रहेछ । त्यहाँबाट उनी अर्घाखाँचीको छायाँ पोलिक्लिनमा गए । त्यहाँ ३० मिनेट बसेर उनी एम्बुलेन्समार्फत क्रिमसन अस्पताल आएका थिए । पुनः जाँचको रिपोर्ट आइसकेको छैन,’ उनले भने ।