भारतसँग जोडिएको पूर्वी लद्दाख सीमामा चीनले विभिन्न चरणको वार्तापछि पनि आफ्ना सैनिकहरू नहटाएको भनी भारतले गुनासो गरेको छ । 

ओपन सोर्स इन्टेलिजेन्स एनालिस्ट डिट्रेस्फाले भूउपग्रहीय तस्वीर जारी गरेको छ जसमा चीनको जनमुक्ति सेना पांगोङ त्सोमा बसिरहेको र क्रमशः सैनिक संख्या बढाउँदै गइरहेको देखिन्छ ।
 

पांगोङ त्सोभन्दा १९ किलोमिटर दक्षिणमा उसका बढी सपोर्ट पोजिसन देखिएको छ । 

भारत र चीनबीच लद्दाखमा चलिरहेको तनाव मंगलवारबाट केही कम भएको देखिन्छ । हिजो दुई देशको जनरल स्तरमा भएको वार्तापछि चीनले पूर्वी लद्दाखमा तनावग्रस्त क्षेत्रमा आफ्ना सैनिकहरू हटाउन सहमति जनाएको छ । 

वार्तामा पूर्वी लद्दाखबाट सैनिकहरू हटाउने विधिलाई अन्तिम रूप दिने विषयमा ध्यान केन्द्रित गरिएको थियो । 

भारतले वास्तविक नियन्त्रण रेखामा मे ५ भन्दा पहिलेको स्थिति हुनुपर्ने अर्थात् चीन आफ्नो सीमातर्फ फर्कनुपर्ने भनेको बुझिएको छ ।