०५ साउन २०८३, मंगलबार
बर्दियामा पाटेबाघको आक्रमणबाट दुई जना घाइते भएका छन्। बर्दिया राष्ट्रिय निकुञ्जबाट निस्केको बाघले आक्रमण गर्दा राजापुर नगरपालिका १० लालपुर गाउँका मोहन थारु र मझेरा गाउँका दयाराम थारु घाइते भएका हुन्।
डिभिजन वन कार्यालय बर्दियाका प्रमुख महेन्द्र वाग्लेका अनुसार गाउँ नजिकै भैँसी चराउँदै गर्दा मोहनलाई बिहान र बाघ रहेको क्षेत्रमा बाघ भगाउन पुगेको टोलीसंँगै पुगेका दयारामलाई दिउँसो बाघले आक्रमण गरेको हो।
बाघको आक्रमणमा परी मोहनको दायाँ हात, बायाँ खुट्टा र पिँठ्युमा गम्भीर चोट लागेको छ। दयारामको भने टाउको र दुवै कञ्चटमा गम्भीर चोट लागेको छ। घाइते दुवैको नेपालगञ्ज मेडिकल कलेजमा उपचार भइरहेको कोठियाघाट प्रहरी चौकीले जनाएको छ ।
