डिमेट्रिया ब्राउनले अमेरिकामा काला जातिका पुरुष जर्ज फ्लोयडलाई गोरा प्रहरी अधिकारीले घुँडाले थिच्दा सास फेर्न नसकेको भन्दै जीवनका लागि भिक्षा मागेको भिडियो हेरिन् । भिडियो हेर्दै जाँदा उनी रोइरहिन् । 

जुन १ मा फ्लोयडको मृत्युको एक हप्तापछि उनले लस एन्जलस काउन्टी प्रोबेसन डिपार्टमेन्टमा डिटेन्सन अफिसरको जागिर त्यागिन् । कोरोनाभाइरस महामारी चलिरहेको बेलामा उनले घर बेचिन्, आफ्ना सिरिसम्पत्ति १३ वटा ठूला झोलामा राखिन् र मेक्सिकोको पुएर्तो भायार्तामा बसाइँ सरिन् । 
 

जातिवाद तथा प्रहरीको ज्यादतीका डरले स्थायी रूपमा अमेरिका छोडेर हिँड्ने अनेकौं काला जातिका अमेरिकीहरूमध्ये ब्राउन पनि एक हुन् । फ्लोयड मारिएको एक महिनापछि उनी जुन २५ मा नयाँ घर पुगिन् । 
‘

त्यो भिडियो हेर्दा मेरो मुटु छियाछिया भयो । त्यसले मलाई अमेरिकाबाट स्थायी रूपमा बाहिरिएपछि मात्र मेरो जीवन सफल हुन्छ भन्ने सोचलाई पुष्टि गरिदियो,’ ब्राउन भन्छिन् । 

काला जातिका मानिस अमेरिकाबाट बाहिर जान थालेको निकै वर्ष भइसकेको छ र यसलाई ब्ल्याक्जिट भन्ने नाम दिइएको छ । फ्लोयडको मृत्युपछि जातिवादको इतिहासलाई सामना गर्ने क्रममा ब्ल्याक्जिटको बहस फेरि हुन थालेको छ । 

कतिजना काला जातिका मानिसले देश छोडे भन्ने विषयमा कुनै आधिकारिक आँकडा उपलब्ध नभए पनि अफ्रिकी र क्यारिबियाली मुलुकहरूमा काला जातिका अमेरिकीहरू बसाइँ सरेर गएको कुरा सामाजिक सञ्जाल चहार्दा थाहा हुन्छ । ती देशहरूमा आफू बढी सुरक्षित अनुभव गर्ने उनीहरूको भनाइ छ । 
 

ब्राउनका लागि जातिवादको डरत्रास विनाको जीवन बाँच्न १२ सय माइल टाढाको रिजोर्ट टाउनमा बस्नु नै उत्तम विकल्प हो भन्ने लाग्यो । 

उनले बसाइँ सर्नुअघि धेरैपटक मेक्सिको भ्रमण गरिन् । त्यहाँ अहिले १५ लाख जति अमेरिकीहरू बस्ने अनुमान गरिन्छ । अमेरिकामा जन्मेका अनि मेक्सिकन आमाबुवासँग फर्केका बालबालिका, अमेरिकाका सेवानिवृत्त अधिकारी र डिजिटल क्षेत्रका घुमन्तेहरू त्यसभित्र पर्छन् । 

बसाइँ सर्ने काम जिन्दगीकै सबभन्दा राम्रो निर्णय भएको ब्राउन बताउँछिन् । मेक्सिको आफैंमा पर्फेक्ट नभए पनि त्यहाँ आफूले जातीय विभेद नबेहोरेको उनको भनाइ छ । 

‘उनीहरू मलाई व्यक्तिका रूपमा व्यवहार गर्छन् । मेरो छालाको रंगले मलाई यहाँ फाइदै दिएको छ र म प्रहरीसँग डराउनुपर्दैन । बन्दूक बोकेका प्रहरी अधिकारीहरू पुएर्तो भायार्तामा हिँड्दा मुस्कुराउँछन् र हात हल्लाउँछन् । कुनै डर छैन ।’
 

सीएनएनबाट