चिनियाँ जनमुक्ति सेनाले सुन जुको प्रसिद्ध पुस्तक आर्ट अफ वारको अनुसरण गर्दै लडाइँ नलडिकनै शत्रुलाई हराउने योजना बनाएको देखिन्छ । 

अगस्ट २९–३० मा पांगोङ तालको दक्षिणी किनारमा भारतीय सेनालाई पहाडको उचाइबाट हटाउनका लागि चिनियाँ सेनाले शुरूमा ट्यांक र इन्फ्यान्ट्री कम्ब्याट भेहिकल ल्यायो । तर भारतीय सेना डेग चलेन । 

चिनियाँ सैन्य रणनीतिले भारतीय सेनालाई फरक नपरेपछि जनमुक्ति सेनाले पञ्जाबी गीत बजाएर लाउडस्पीकरमा घन्कायो । त्यो सुनेर भारतीय सैनिकहरू पेट मिचीमिची हाँसे । पांगोङ तालमा पञ्जाबी गीतमा सैनिकहरू नाचे । 

उता चुशुल सेक्टरको मोल्दो ग्यारिसनमा चिनियाँ सेनाले भारतीय सैनिकहरूलाई राजनीतिक नेताहरूको मूर्खतामा नपर्न सुझाव दिए । 

चिनियाँ लाउडस्पीकरहरूले शुद्ध हिन्दीमा बोल्दै भारतीय सैनिकहरूलाई जाडो महिनामा यस्तो उचाइमा दिल्लीका नेताहरूको मर्जीमुताबिक नबस्न आग्रह गरे । 

चिनियाँ जनमुक्ति सेनाले भारतीय सैनिकहरूलाई हतोत्साहित गर्न र तातो खानेकुरा तथा बन्दोबस्तीको सामान नपाएको भनी भारतीय सैनिकहरूमा रहेको असन्तुष्टिलाई बढाइचढाइ गर्न खोजेको छ । अनि बाक्लो हिउँ पर्ने शिशिर ऋतु त आउनै लागेको छ । 

यसो गर्दा भारतीयहरू युद्ध नलडिकनै त्यस ठाउँबाट हिँड्लान् भन्ने चिनियाँहरूको आशा छ ।

भारतका एक पूर्व सैन्य प्रमुखका अनुसार, पीएलएले यही रणनीति सन् १९६२ को युद्धमा पनि उपयोग गरेको थियो भने सन् १९६७ मा नाथु लामा भएको भिडन्तमा यसलाई अपनाएको थियो । 

‘तर भारतीय सैनिकहरू फिंगर ४ मा पञ्जाबी गीत सुनेर छक्क परे । शायद उनीहरूले त्यहाँ रहेका भारतीय सैनिक पञ्जाबी होलान् भन्ने सोचे,’ उनले बताए । 

हिन्दुस्तान टाइम्सबाट