अवैध हतियारबाट सर्वसाधारणलाई त्रसित र आंतकित पार्दै हिँड्ने १ जनालाई प्रहरीले पक्राउ गरेको छ । 

पक्राउ पर्नेमा जिल्लाको बन्दीपुर गाउँपालिका–६ का ४० वर्षीय अशोक गुरुङ रहेका छन् ।

प्राप्त सूचनाका आधारमा इलाका प्रहरी कार्यालय बन्दीपुर र इलाका प्रहरी कार्यालय भानु मुकाम डुम्रेबाट खटिएर गएको प्रहरी टोलीले २ थान पेस्तोलसहित उनलाई घरबाट मंगलवार पक्राउ गरेको जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सेनाले जानकारी दिए ।

उनका अनुसार गुरुङको घरबाट प्रहरीले २ थान पेस्तोलसहित वन्यजन्तुसँग सम्बन्धित सामग्री बरामद गरेको छ । घरभित्र लुकाई राखेको अवस्थामा ९ एमएमको अटो पेस्तोल, ७.५ इन्च लम्बाई र ५.५ चौडाई भएको म्याग्जिन र सोही म्याग्जिनमा रहेको १ राउन्ड गोली, ७ इन्च लम्बाई र ५ इन्च चौडाई भएको म्याग्जिन सहितको १ थान पेस्तोल बरामद गरिएको प्रनाउ तिमिल्सिनाले जानकारी दिए ।

२ वटा सुटकेशभित्र लुकाइछिपाइ राखेको अवस्थामा ५ वटा विभिन्न वन्यजन्तु सामग्री बरामद गरेको छ । विभिन्न आकारका लम्बाइ, चौडाइ भएका छालाजस्तो देखिने वस्तु पानको पात आकारमा बिचमा ॐ लेखेको ५.५ इन्च लम्बाइ ४ इन्च चौडाइ भएका १ थान वस्तु बरामद गरेको हो ।

जंगली जनावरको छालाजस्तो देखिने ६ इन्च लम्बाइ, २.५ इन्च गोलाइको वस्तु १ थान र जंगली जनावरको छालाजस्तो देखिने ७ इन्च लम्बाइ र १.५ इन्च गोलाइ भएको वस्तु १ थान बरामद गरेको छ । जंगली जनावरको छालाजस्तो देखिने १० इन्च लम्बाइ २.५ इन्च गोलाइ भएको वस्तु थान १ र जंगली जनावरको छालाजस्तो देखिने ‘भी’ आकारको वस्तु १ थान तथा जंगली जनावरको सिङजस्तो देखिने १ फिट लम्बाइ, फेद गोलाइ ४.५ इन्च र टुप्पाको गोलाइ १ इन्च भएको वस्तु १ थानसहित बरामद गरेको प्रहरीले जनाएको छ । 

जंगली जनावरको सिङजस्तो देखिने १ फिट ३ इन्च लम्बाइ फेदको गोलाइ ३ इन्च, टुप्पोको गोलाइ १.५ इन्च भएको वस्तु १ थान पनि प्रहरीले बरामद गरेको छ । सोही सुटकेशको साइड गोजीमा प्लाष्टिकमा पोका पारी राखेको ५० ग्राम गाँजाजस्तो पदार्थसमेत बरामद गरेको जिल्ला प्रहरी कार्यालय तनहुँले जनाएको छ ।