अमेरिकी संसद्ले जो बाइडन निर्वाचनमा विजयी भएको प्रमाणित गरेको छ । 

नियमित प्रक्रियाका रूपमा संसद्ले गर्ने प्रमाणीकरण ट्रम्प समर्थकहरूको उपद्रोका कारण केही घन्टा बिथोलिएको थियो । 

दुवै सदनले बाइडनको इलेक्टोरल कलेज विजयलाई बिहीवार प्रमाणीकरण गरेका हुन् । 

ट्रम्प समर्थकहरूले हिंसा मच्चाएको ६ घन्टापछि सदन पुनः सञ्चालन गरिएको थियो । 
 

रिपब्लिकन पार्टीका १३ जना सिनेटर र तल्लो सदनका कैयौं सांसदले ६ वटा राज्यका मतपरिणामका विषयमा बहस गराउन खोजेका थिए । 

तर ट्रम्प समर्थकहरूको ताण्डवपछि रिपब्लिकनहरूले बाइडनको विजयलाई उल्ट्याउने प्रयास त्यागे । एरिजोना र पेन्सिल्भेनियाको मतपरिणामलाई मात्र चुनौती दिइएको थियो । ती प्रयासलाई सदनले बेइज्जतीपूर्ण तरिकाले पराजित गरिदियो । 
 

बाइडनले ३०६ अनि ट्रम्पले २३२ इलेक्टोरल भोट ल्याएका थिए । जनवरी २० मा बाइडनलाई राष्ट्रपति पदको शपथ दिलाइनेछ ।