नवलपरासी (बर्दघाट–सुस्तापूर्व) मा भएको छुट्टाछुट्टै दुर्घटनामा परी ६ जना घाइते भएका छन् ।

जिल्लाको मध्यविन्दु–१५ र कावासोती–१ मा शनिवार भएका छुट्टाछुट्टै २ वटा दुर्घटनामा परी ६ जना घाइते भएका प्रहरीले जनाएको छ ।

शनिवार राति मध्यविन्दु–१५ मा पर्ने अरुणखोला र चोरमाराबीचको जंगलमा भएको सवारी दुर्घटनामा परी ३ जना घाइते भएका छन् । पूर्वपश्चिम राजमार्गमा भएको दुर्घटनामा पूर्वबाट पश्चिमतर्फ जाँदै गरेको प्र३–०१–०२४ च ६३८१ नम्बरको बोलेरो र विपरीत दिशाबाट आउँदै गरेको रा१ख ७६९ नम्बरको ट्रक एकआपसमा ठक्कर खाँदा भएको दुर्घटनामा ३ जना गम्भीर घाइते भएका हुन् ।

दुर्घटनामा परी ट्रक चालक सल्यानको शारदा नगरपालिका–५ का २६ वर्षीय घनश्याम बुढाथोकी, बोलेरो चालक मकवानपुरको हेटौंडा उपमहानगरपालिका–९ का २८ वर्षीय मनिष तिमिल्सिना र बोलेरोमा सवार २३ वर्षीय रन्जित माझी घाइते भएको जिल्ला प्रहरीका प्रवक्ता प्रहरी नायब उपरीक्षक गिरीले बताए ।

त्यसैगरी, शनिवार राति नै कावासोती–१ रिठ्ठेपानीको भित्री सडकखण्डमा रिठ्ठेपानीबाट कावासोतीतर्फ आउँदै गरेको लु३त ६२१५ नम्बरको ट्रयाक्टर आफैं अनियन्त्रित भई पल्टिँदा ट्रयाक्टरमा सवार ३ जना घाइते भएका छन् ।

दुर्घटनामा परी मध्यविन्दु–६ का २४ वर्षीया सुनिता बोटे, ४५ वर्षीय लालमणि महतो र २५ वर्षीया लक्ष्मी कुमाल घाइते भएका छन् । घाइते सबैको मध्यविन्दु जिल्ला अस्पतालमा उपचार भइरहेको प्रहरीले जनाएको छ ।