कोरोनाको नयाँ भेरियन्टसहितको संक्रमण बढ्दै गएको भन्दै बागलुङका केही वडामा निषेधाज्ञामा कडाइ गरिने भएको छ । 

जिल्ला प्रशासन कार्यालयले आइतवार राति १२ बजेदेखि लागू हुने गरी हाल कायम निषेधाज्ञामा कडाइ गर्ने भएको हो । 

बागलुङ नगरपालिका वडा १२ र वडा १३ (साविक अमलाचौर र पैयूपाँटा गाविस) को क्षेत्रभित्र आइतवार राति १२ बजेदेखि भदौ १ गते राति १२ बजेसम्म लागू हुने गरी निषेधाज्ञा जारी गरिएको प्रमुख जिल्ला अधिकारी शिवकुमार कार्कीले बताए । 

निषेधाज्ञामा अत्यावश्यक सेवा, स्वास्थ्य सेवा र सरकारी सेवाका सवारीबाहेक सबै यातायातका साधन र बजार क्षेत्र बन्द गरिने छ । 

कालीगण्डकी करिडोर र अन्य सडक मार्गमा चल्ने यातायातका साधन उक्त वडाहरूमा यात्रुहरू चढ्न र झर्न नपाउने गरी सञ्चालन हुन पाउने छन् । 

साथै शैक्षिक संस्थासहितका सेवा तथा स्थलहरू बन्द रहने छन् । विवाहलगायतका संस्कारजन्य कार्य गर्दा स्वास्थ्य मापदण्ड पालन गरी ७ जनाभन्दा बढी सहभागी हुन नपाइने आदेश छ ।