कर्मचारी नै राखेर अनलाइनमार्फत जुवा खेलाउने १२ जनालाई महानगरीय अपराध महाशाखाले पक्राउ गरेको छ ।

महाशाखाबाट खटिएको विशेष प्रहरी टोलीले काठमाडौंको कीर्तिपुर नगरपालिका–६ चोभार, वडा नम्बर–९ नगाउँ र वडा नम्बर–१० बागभैरवस्थित विभिन्न घरमा अनलाइन जुवा खेलाइरहेको अवस्थामा जुवा खेलाउन प्रयोग हुने ल्यापटप, मोबाइल लगायतका विद्युतीय उपकरणसहित १२ जनालाई पक्राउ गरेको छ ।

पक्राउ परेका आरोपीलाई आवश्यक कारवाहीका लागि महानगरीय प्रहरी परिसर काठमाडौंमा पठाइएको प्रहरीले जनाएको छ ।

पक्राउ परेका व्यक्तिमध्ये सुजेन्द्र थापा, प्रदीपमान सिंह बस्नेत र बुद्ध महर्जनले अनलाइन जुवा खेलाउन सम्पूर्ण प्रपञ्च मिलाई ३ वटा घरमा २४ घण्टै सिफ्टवाइज रूपमा अनलाइनमार्फत जुवा खेलाउनका लागि कर्मचारी समेत राखेको देखिएको प्रहरीले जनाएको छ ।

कर्मचारीले फेसबूक आईडीमार्फत अमेरिकन तथा युरोपियन नागरिकलाई साथी बनाएर अनलाइन जुवा खेल्न स्लीप शेयर गरी गेममा अमेरिकन डलर लोड गर्न लगाई गेम खेलाउने तथा जित्ने पक्षलाई तोकिएको धनराशी समेत पुरस्कारको रूपमा दिने गरेको देखिएको प्रहरीले जनाएको छ ।

जुवा खेलाउने व्यक्तिलाई सोधपुछ गर्दा करीब १० महिना अघिदेखि महिनाको करीब १ लाख अमेरिकी डलरभन्दा बढी रकम हारजीत हुने गरी अनलाइन जुवा खेलाउने गरेको बुझिएको प्रहरीले जनाएको छ ।

पक्राउ परेको व्यक्तिमा काठमाडौंको कीर्तिपुर–६ चोभार बस्ने ३३ वर्षीय सुजेन्द्र थापा, १७ वर्षीय मनिश थापा, १७ वर्षीय समिर थापा, २७ वर्षीया कविता थापा, ३० वर्षीय रबिन खड्का, वडा नम्बर–१० कीर्तिपुर बस्ने ४५ वर्षीय बुद्ध महर्जन, वडा नम्बर–८ पाँगा बस्ने २० वर्षीया रोजा महर्जन, १९ वर्षीय साहिल महर्जन, वडा नम्बर १० बस्ने १९ वर्षीया हनिशा महर्जन, वडा नम्बर–९ नगाँउ बस्ने ३५ वर्षीय प्रदीपमान सिंह बस्नेत, बझाङको केदारस्यू गाउँपालिका–५ घर भई हाल कीर्तिपुर बस्ने १९ वर्षीय बिनोद ठगुन्ना र सिन्धुपालचोकको मेलम्ची–१३ घर भई हाल कीर्तिपुर बस्ने १७ वर्षीया रमादेवी श्रेष्ठ रहेका छन् ।

पक्राउ परेका व्यक्तिबाट विभिन्न कम्पनीका मोबाइल १७ वटा, विभिन्न कम्पनीका ल्यापटप १४ वटा, कम्प्युटरको सीपीयू २ वटा, कम्प्युटर मोनिटर २ वटा, राउटर ३ वटा, गेमिङ विवरण लेखिएका रजिस्टरहरू थान र ह्वाइट बोर्ड २ वटा बरामद गरिएका प्रहरीले जनाएको छ ।