जिल्ला प्रहरी कार्यालय कास्कीले वन्यजन्तुको अखेटोपहार र हतियारसहित १ जनालाई पक्राउ गरेको छ ।

प्रहरी टोलीले पोखरा महानगरपालिका–२२ पुम्दीभुम्दी बस्ने २८ वर्षीय खोबहादुर थापालाई पक्राउ गरेको हो ।

उनको घरबाट अवैध वन्यजन्तु चितुवाको जस्तो देखिने छाला ७ फिट लम्बाइ, २ फिट ६ ईन्च चौडाइ भएको पुच्छर सहितको टाटेपाटे आकारको खैरो रंगको छाला, वन्यजन्तु चितुवाको जस्तो देखिने २ वटा दाह्रा सहितको दाँतको भागको टुक्रा १, ३ फिट १०.०५ इन्च लम्बाई भएको भिर्ने फित्ता (सिलिङ) सहितको २ नाले कार्तुस बन्दुक १, बन्दुकमा लाग्ने प्रयोग भइसकेको खाली खोका ४५, बन्दुकमा लाग्ने धातुका छर्रा १९१, बन्दुकमा प्रयोग हुने बारुद ३१५ ग्राम, बन्दुकमा प्रयोग हुने धातुका सानो छर्रा १५० ग्राम, छर्रा बनाउन प्रयोग हुने सिसाको धातुको विभिन्न आकारको डल्लो पदार्थ ३ र सानो पटका रहेको रातो रंगको पत्ता १ बरामद गरिएको प्रहरीले जनाएको छ ।

उनलाई नियन्त्रणमा लिई कास्की जिल्ला अदालतबाट हातहतियार तथा खरखजाना सम्बन्धी कसूरमा ७ दिन म्याद थप गरी अनुसन्धान कार्य अगाडि बढाइएको छ ।

वन्यजन्तु संरक्षण ऐन २०२९ सम्बन्धी कसूर गरेको हुँदा थप अनुसन्धान र कारवाहीको लागि वन्यजन्तुको अखेटोपहार डिभिजन वन कार्यालय कास्कीमा पठाउने प्रक्रियामा रहेको प्रहरीले जनाएको छ ।